“Həkimlər və Tibb Tələbələri” İctimai Birliyinin nəzdində fəaliyyət göstərən Tibb Təhsili üzrə Daimi Komitənin (SCOME) təşkilatçılığı ilə tibb tələbələri üçün “Paradigm Shifts in Medicine: İnvaziv Radiologiya Erası” mövzusunda maarifləndirici seminar keçirilib. Tədbirin əsas məqsədi tibbdə baş verən paradiqma dəyişikliklərini, minimal invaziv yanaşmaların müasir klinik praktikadakı rolunu və bu sahənin gələcək perspektivlərini tələbələrə elmi əsaslarla təqdim etmək olub.

Azmedinfo.az xəbər verir ki, seminarda spiker qismində çıxış edən Uzm. Dr. Nicat Alışev əvvəlcə tibbin tarixi inkişaf mərhələlərinə toxunaraq, müasir dövrdə sübutlu təbabət (evidence-based medicine) yanaşmasının əhəmiyyətini xüsusi vurğulayıb. O, tibbi qərarvermə prosesində elmi sübutların, klinik təcrübənin və pasiyent dəyərlərinin inteqrasiyasının vacibliyini qeyd edib. Eyni zamanda, məruzəçi özünün könüllü tibbi fəaliyyət təcrübələrindən bəhs edərək, müxtəlif çətin şəraitlərdə həkim məsuliyyətinin və etik yanaşmanın önəmini iştirakçılarla bölüşüb.

Məruzənin davamında invaziv radiologiyanın müasir təbabətdə yaratdığı fundamental və inqilabi dəyişikliklər ətraflı şəkildə müzakirə olunub. Dr. Alışev invaziv radiologiyanın bir çox hallarda cərrahi müdaxiləyə alternativ və ya daha az travmatik seçim kimi üstünlüklərini izah edərək, minimal invaziv prosedurların pasiyentlər üçün daha qısa hospitalizasiya müddəti, minimum komplikasiya riski və sürətli reabilitasiya ilə nəticələndiyini diqqətə çatdırıb.

Seminar çərçivəsində müasir klinik prosedurlar və xüsusilə müxtəlif ablasiya metodları geniş şəkildə təqdim olunub. Radiofrekans ablasiya (RFA) üsulunun xoşxassəli tiroid düyünlərində tətbiqi, eləcə də etanol ablasiyasının simptomatik kistalarda, o cümlədən exinokok kistlərində istifadəsi barədə detallı məlumat verilib. Bundan əlavə, qaraciyər və digər daxili orqan şişlərində ablasiya prosedurlarının rolu, həmçinin kəskin qanaxmalar zamanı endovaskulyar müdaxilələrin effektivliyi iştirakçıların diqqətinə çatdırılıb.

Tədbirin son hissəsində prostat xərçənginin diaqnostikasında istifadə olunan füzyon (fusion) biopsiya texnikası və invaziv onkologiya sahəsində tətbiq edilən ən son yanaşmalar seminarın əsas müzakirə mövzularından olub. Tələbələrin aktiv iştirakı ilə keçən interaktiv sual-cavab sessiyasında invaziv radiologiyanın gələcək inkişaf istiqamətləri və cərrahiyyə ilə müqayisəli üstünlükləri ətrafında fikir mübadiləsi aparılıb. Yekunda qeyd olunub ki, bu növ tədbirlər tibb tələbələrinin elmi dünyagörüşünün artırılmasına və gələcəyin texnologiyalarına adaptasiyasına mühüm töhfə verir.