Almaniyanın Siegen şəhərində yerləşən "Diakonie Klinikum Siegen" xəstəxanasının Kardiologiya, Ritmologiya və Angiologiya şöbəsinin baş həkimi, professor Dursun Gündüz və klinikanın mütəxəssis həkimi Firudin Qurbanovun rəsmi dəvəti əsasında Azərbaycan nümayəndə heyəti Almaniyaya səfər edib.

Azmedinfo.az xəbər verir ki, səfər çərçivəsində Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova, Nazirliyin Tikilməkdə olan Müəssisələrin Müdiriyyətinin direktoru Elşad Hacıyev və İnstitutun direktor müavini Azər Mirzəxanlı bir sıra mühüm rəsmi görüşlərdə iştirak ediblər.

Görüşlər zamanı əsas diqqət kardiologiya sahəsində peşəkar təcrübə mübadiləsinə, müasir tibbi texnologiyaların tətbiqinə və klinik idarəetmə mexanizmlərinin öyrənilməsinə yönəldilib. Eyni zamanda nümayəndə heyəti Almaniyanın xəstəxana tikintisi və infrastruktur standartlarını yerindəcə araşdıraraq, iki ölkənin müvafiq tibb müəssisələri arasında perspektiv əməkdaşlıq istiqamətlərini müəyyənləşdiriblər.