Azərbaycan Tibb Universitetinin ev sahibliyi ilə qadın sağlığına həsr olunmuş “Qadın Ürəyi – Sağlam Həyat” adlı tədbir keçirilib. Genişmiqyaslı elmi-praktik əhəmiyyət kəsb edən bu toplantıda qadınların ürək-damar sağlamlığına dair ən aktual məsələlər, hormonal dəyişikliklərin kardiologiyaya təsirləri, düzgün qidalanma strategiyaları, sağlam yaşlanma metodları və stressin idarə olunması kimi mühüm mövzular müasir multidissiplinar yanaşmalar çərçivəsində təhlil edilib.

Azmedinfo.az xəbər verir ki, tədbirdə müxtəlif ixtisaslar üzrə peşəkar həkimlərin məruzələri dinlənilib və auditoriyanın aktiv iştirakı ilə yüksək səviyyəli interaktiv diskussiyalar həyata keçirilib.

“Tibbdə liderlik və səhiyyə təşkilatı” mövzusuna həsr olunmuş panel müzakirəsində Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova, Azərbaycan Tibb Universitetinin prorektoru, professor Məlahət Sultanova, həmçinin tanınmış mütəxəssislər doktor Sevda Əlizadə və Ülviyyə Cabbarova çıxış edərək sahə üzrə strateji fikirlərini bölüşüblər.

Elmi-Tədqiqat Kardiologiya İnstitutunun direktoru, professor Gülnaz Dadaşova öz nitqində qadın orqanizminin fizioloji özəlliklərinin kardiologiya elmində mütləq şəkildə nəzərə alınmalı olduğunu xüsusi vurğulayıb. Professor qeyd edib ki, qadın ürəyi özünəməxsus fərqliliklərə malikdir və bu nüanslar xəstəliklərin erkən diaqnostikası ilə yanaşı, həm də düzgün profilaktik metodların seçilməsini zəruri edir. O, həmçinin əlavə edib ki, genişmiqyaslı maarifləndirmə tədbirləri və müxtəlif tibbi sahələr arasında qurulan kompleks əməkdaşlıq qadınların uzunömürlü, sağlam və keyfiyyətli həyat sürməsinin ən başlıca təminatıdır.

Məzmunlu çıxışlar və elmi müzakirələrlə zəngin olan tədbir “Qadın Ürəyi – Azərbaycan” təşəbbüsünün geniş ictimaiyyətə təqdimatı və fəaliyyəti ilə fərqlənən şəxslərin təntənəli təltifetmə mərasimi ilə öz işini uğurla yekunlaşdırıb.