“Həkimlər və Təbib Tələbələr” İctimai Birliyinin tərkibində fəaliyyət göstərən Elmi Mübadilə üzrə Daimi Komitənin (SCORE) təşkilatçılığı ilə gənclər üçün maarifləndirici sessiya keçirilib.

Azmedinfo.az xəbər verir ki, tədbir çərçivəsində “From Idea to Funding: Applying for Research Grants” mövzusunda təqdimat baş tutub və əsas diqqət tədqiqat ideyasının formalaşdırılmasından başlayaraq qrant müraciətlərinin hazırlanması prosesinə yönəldilib. Qeyd etmək lazımdır ki, tədbirdə beynəlxalq tələbələr də iştirak edib və sessiya tam şəkildə ingilis dilində keçirilib.

Sessiyanın spikeri Günel Əyyubova tədqiqat qrantlarına müraciət prosesi haqqında iştirakçılara ətraflı məlumat verib. O, öz şəxsi təcrübələrini bölüşərək elmi layihə ideyasının formalaşdırılması, layihənin məqsəd və hədəflərinin düzgün müəyyənləşdirilməsi, qrant müraciətlərinin hazırlanması və işin beynəlxalq standartlara uyğun şəkildə təqdim olunması kimi vacib məqamları izah edib. Spiker həmçinin tədqiqat fəaliyyətinin xüsusilə tibbi tələbələrin akademik inkişafında oynadığı mühüm rolu vurğulayıb.

Sessiya boyunca iştirakçılara qrant müraciətlərinin hazırlanması zamanı diqqət yetirilməli əsas prinsiplər və uğurlu layihələrin xüsusiyyətləri barədə praktik tövsiyələr təqdim olunub. Təqdimatın sonunda iştirakçılar spikerə müxtəlif suallar ünvanlayıb və Günel Əyyubova onların suallarını cavablandıraraq əlavə izahlar verib.

Tədbir sonda iştirakçıların spikerlə birlikdə xatirə şəkilləri çəkməsi ilə yekunlaşıb. Sessiya iştirakçılara tədqiqat qrantlarına müraciət prosesi haqqında həm nəzəri məlumat əldə etmək, həm də gələcək akademik fəaliyyətləri üçün faydalı istiqamətlər qazanmaq imkanı yaradıb.