Həyat bəxş etmək öz əlimizdədir

13 Mart 2026

298

Azərbaycanda 4 mindən çox insan dializ müalicəsi alır. Dializ saatlarla davam edən prosedur, pəhriz məhdudiyyətləri və tez-tez yaranan yorğunluqla müşayiət olunur. Dializ xəstələr üçün həm fiziki, həm də psixoloji sınaqdır. Amma böyrək transplantasiyası həyat keyfiyyətini tamamilə dəyişdirə bilər.

Azmedinfo.az xəbər verir ki, Transplantasiya ilə xəstələr dializdən azad olur, normal həyat tərzinə qayıda bilər və uzunmüddətli sağlamlıq perspektivlərini artırır. Burada isə orqan ianəsi həyati rol oynayır. Hər orqan ianəsi kimin üçünsə yeni bir başlanğıc şansıdır.

Bir çox insan düşünür: “Niyə mən orqan bağışlamalıyam?” Əslində cavab çox sadədir. Çünki bir insanın verdiyi razılıq başqa bir insanın həyatını xilas edə bilər.

Orqan ianəsi sizin həyatınızdan heç nə almır, amma başqa bir insana həyat bəxş edir.

Cəmiyyət yalnız insanların bir-birinə dayaq olduğu zaman güclü olur. Orqan bağışı həmrəylik və insanlıq dəyərinin ən real nümunələrindən biridir.

Bu həm də empati məsələsidir. Bu gün orqan gözləyən insan başqasıdır, amma sabah belə bir ehtiyac hər birimizin və ya yaxınlarımızın qarşısına çıxa bilər. Hər kəs sağlam qalmaq istəyir, lakin həyat bəzən gözlənilməz olur.

Orqan ianəsi eyni zamanda cəmiyyətə verilən bir töhfədir. Buna görə də orqan bağışlamaq haqqında düşünmək və razılıq vermək hər birimizin verə biləcəyi ən dəyərli qərarlardan biridir.

Orqan Donorluğu və Transplantasiyası üzrə Koordinasiya Mərkəzi