Səhiyyə Nazirliyinin Elmi-Tədqiqat Kardiologiya İnstitutunda (ETKİ) müəssisə rəhbərliyi ilə gələcəyin kardioloqları olan rezident həkimlər arasında səmimi və işgüzar formatda görüş keçirilib.

Azmedinfo.az xəbər verir ki, tədbir çərçivəsində rezidentlərin gündəlik fəaliyyət prinsipləri, tədris kurikulumu və klinik təcrübənin dərinləşdirilməsi ilə bağlı rəy və təklifləri diqqətlə dinlənilib. Qarşılıqlı dialoq mühitində keçən görüşdə gənc mütəxəssisləri maraqlandıran suallar ətraflı şəkildə cavablandırılıb.

İnstitutun direktoru, professor Gülnaz Dadaşova çıxış edərək kadr potensialının artırılmasına xüsusi diqqət yetirib. Rezidentlərin peşəkar inkişafı və müasir tibbi biliklərə yiyələnməsini institutun strateji prioritetlərindən biri kimi qiymətləndirib. Gənc həkimlərin elmi-praktik təşəbbüsləri və proseslərdəki aktiv iştirakını kardiologiya sahəsinin gələcəyi üçün müstəsna əhəmiyyət kəsb etdiyini bildirib.

Görüşdə tədris prosesinin təkmilləşdirilməsi, klinik təcrübə və rezidentlərin elmi-tədqiqat işlərinə daha geniş cəlb olunmasına dair fikir mübadiləsi aparılıb.