“Həkimlər və Təbib Tələbələr” İctimai Birliyinin tərkibində fəaliyyət göstərən Tibb Təhsili üzrə Daimi Komitənin (SCOME) təşkilatçılığı ilə tibb tələbələri üçün “Tibb tələbələrinin neyrocərrahiyyə konfransı” Yeni Klinikada keçirilib. Tədbirin əsas məqsədi neyrocərrahiyyə sahəsində aktual mövzular haqqında tələbələrə praktik təcrübəyə əsaslanan məlumat təqdim etmək və klinik yanaşmalarla tanış etmək olub.

Azmedinfo.az xəbər verir ki, konfransda məruzəçi qismində çıxış edən Tural Rəhimli və Cəmil İskəndərli neyrocərrahiyyə sahəsində müxtəlif patologiyalar barədə məlumat veriblər.

Dr.Tural Rəhimli xüsusilə optik qlioma, xordoma və kraniofaringioma kimi xəstəliklər, diaqnostik yanaşmalar və müasir cərrahi müalicə üsulları haqqında danışıb, endoskopik endonazal əməliyyatlara dair görüntülər təqdim edib.
Dr.Cəmil İskəndərli isə onurğa sütunu patologiyalarını əhatə edən təqdimatla çıxış edib: fəqərəarası disk yırtıqları, spondilolistez, degenerativ skolioz, onurğa kanalı stenozu (mərkəzi və lateral) və disk protezləri barədə məlumat verib. Məruzəçi həmçinin MRT müayinəsinin bu patologiyaların diaqnostikasında aparıcı rol oynadığını qeyd edib.

Hər iki məruzəçi preoperativ (preop) və postoperativ (postop) mərhələlər barədə məlumat verərək əməliyyat prosesində və sonrası yanaşmaları iştirakçılarla bölüşüblər.

Konfransın sonunda iştirakçıların sualları cavablandırılıb və mövzular ətrafında müzakirələr aparılıb. Sual-cavab sessiyası tələbələrin neyrocərrahiyyə sahəsinə dair maraq doğuran məqamları aydınlaşdırmaq və klinik biliklərini dərinləşdirmək baxımından tədbirin ən aktiv mərhələsini təşkil edib.