Çin Xalq Respublikasının Şanxay şəhərində yerləşən və regionun ən qabaqcıl tibb mərkəzlərindən biri hesab olunan Ruijin Hospital-da beynəlxalq səhiyyə əməkdaşlığı baxımından mühüm tədbirlər keçirilir.

Azmedinfo.az xəbər verir ki, sözügedən nüfuzlu tibb müəssisəsinin bazasında metabolik xəstəliklər üzrə beynəlxalq əməkdaşlıq platforması çərçivəsində silsilə elmi görüşlər təşkil olunmuş; şəkərli diabet, piylənmə və ürək-damar xəstəliklərinin müasir idarə olunması istiqamətində qabaqcıl yanaşmalar müzakirə edilmişdir.

Səfər çərçivəsində Azərbaycan Respublikası Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova Ruijin Hospital və onun nəzdində fəaliyyət göstərən ixtisaslaşmış klinik və elmi bölmələrlə yaxından tanış olmuş, keçirilən görüşlərdə fəal iştirak etmişdir.

Professor Gülnaz Dadaşova beynəlxalq elmi əməkdaşlığın strateji əhəmiyyətini xüsusi vurğulayaraq qeyd edib ki, bu cür təşəbbüslər innovativ tibbi texnologiyaların tətbiqinin genişlənməsinə, elmi bilik və təcrübə mübadiləsinin dərinləşməsinə, eyni zamanda Azərbaycan səhiyyə sisteminin beynəlxalq inteqrasiyasına mühüm töhfə verir.

Səfərin davamı olaraq nümayəndə heyəti Çinin Çançjou şəhərində yerləşən və dünyada yüksək texnologiyalı tibbi avadanlıqların istehsalı sahəsində aparıcı şirkətlərdən biri olan "United Imaging Healthcare" şirkətinin istehsal müəssisəsində olmuşdur. Burada tibbin gələcəyini formalaşdıran ən son cihazlar və diaqnostik imkanlar nəzərdən keçirilmişdir.