Bariatrik-metabolik cərrahiyyə və metabolik xəstəliklərə yeni yanaşmalar müzakirə edilib

Bariatrik-metabolik cərrahiyyə və metabolik xəstəliklərə yeni yanaşmalar müzakirə edilib

29 Aprel 2026

170

Azərbaycan Bariatrik Metabolik Cərrahlar Assosiasiyasının təşkilatçılığı ilə 7-ci Beynəlxalq bariatrik-metabolik cərrahiyyə və metabolik xəstəliklər konqresi keçirilib.

Azmedinfo.az xəbər verir ki, tədbirdə çıxış edən səhiyyə nazirinin müavini Nadir Zeynalov bariatrik və metabolik cərrahiyyənin nisbətən yeni sahə olduğunu, bu istiqamətin pasiyentlərin həyat keyfiyyətini yaxşılaşdırdığını və vaxtından əvvəl ölüm riskini 30–50 faiz azaltdığını bildirib.

Azərbaycan Tibb Universitetinin prorektoru Məlahət Sultanova, Milli Məclisin Səhiyyə komitəsinin üzvləri Rəşad Mahmudov, İlham Məmmədli və Müşfiq Məmmədli isə ölkədə səhiyyə islahatlarının əhəmiyyətini və tibb işçilərinin peşə hazırlığının daim yeniləndiyini vurğulayıblar.

Konfransda Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin sədri Yeganə Abbasova “Orqan donorluğu və transplantasiyasında yeni səhifə” mövzusunda çıxış edərək ölkədə bu sahənin inkişafı, aparılan islahatlar və əldə olunan nəticələr barədə məlumat verib. O bildirib ki, orqan donorluğu və transplantasiya tibbdə həyati əhəmiyyətli istiqamətlərdən biridir və burada beynəlxalq təcrübəyə uyğun yeni yanaşmalar tətbiq olunur.

Yeganə Abbasova həmçinin qeyd edib ki, son illərdə donor bazasının genişləndirilməsi, ictimai maarifləndirmənin gücləndirilməsi və tibb müəssisələrinin imkanlarının artırılması istiqamətində mühüm addımlar atılıb. Onun sözlərinə görə, bu sahənin inkişafı daha çox insanın həyatının xilas olunmasına və səhiyyə sistemində keyfiyyət göstəricilərinin yüksəlməsinə xidmət edir.

Tədbir yerli və xarici mütəxəssislərin elmi bilik və təcrübə mübadiləsi, həmçinin ölkələrarası peşəkar əlaqələrin genişləndirilməsi üçün mühüm platforma kimi qiymətləndirilib. Konqres ümumilikdə sahənin inkişafına töhfə verən səmərəli elmi müzakirələrlə yekunlaşıb.