Tibbi tullantıların düzgün idarə olunması ilə bağlı maarifləndirmə və ətraf mühitin mühafizəsinə mühüm töhfə

30 Aprel 2026

392

11 saylı Regional Ekologiya və Təbii Sərvətlər İdarəsinin Ətraf mühitdən istifadənin tənzimlənməsi, mətbuatla iş və ekoloji maarifləndirmə şöbəsinin baş məsləhətçisi Ləman Fərəcli tərəfindən Səhiyyə Nazirliyi K.Y. Fərəcova adına Elmi-Tədqiqat Pediatriya İnstitutunda tibbi tullantıların düzgün idarə olunması mövzusunda seminar keçirilib.

Azmedinfo.az xəbər verir ki, seminarda direktorun inzibati işlər üzrə müavini, baş tibb bacısı, tibb bacıları, kiçik tibb işçiləri iştirak ediblər.

Seminar zamanı tibb müəssisələrində yaranan tullantıların növləri, onların düzgün çeşidlənməsi, toplanması, daşınması və zərərsizləşdirilməsi qaydaları barədə ətraflı məlumat verilib. Bildirilib ki, tibbi tullantıların düzgün idarə olunmaması həm ətraf mühit, həm də insan sağlamlığı üçün ciddi risklər yarada bilər.

Ləman Fərəcli çıxışında qeyd edib ki, mövcud normativ-hüquqi aktlara uyğun olaraq tibbi tullantılar xüsusi qaydalara əsasən idarə olunmalı, təhlükəli tullantılar digər məişət tullantılarından ayrılmalı və xüsusi qablaşdırmada saxlanılmalıdır. O, həmçinin tibb işçilərinin bu sahədə maarifləndirilməsinin vacibliyini vurğulayıb.

Eyni zamanda, Ləman Fərəcli institutun baş tibb bacısı Nazilə Məmmədovanın fəaliyyətini yüksək qiymətləndirərək onun peşəkarlıqla çalışdığını qeyd edib və görülən işlərdən məmnunluğunu ifadə edib. O, həmçinin yaradılan şəraitə və əməkdaşlığa görə institutun direktoruna təşəkkürünü bildirib.

Tədbirin sonunda vurğulanıb ki, bu cür maarifləndirici görüşlər tibbi tullantıların düzgün idarə olunması sahəsində bilik və bacarıqların artırılmasına, eyni zamanda ətraf mühitin mühafizəsinə mühüm töhfə verir.