Ümumdünya İmmunlaşdırma Həftəsi çərçivəsində tədbirlər davam edir

03 May 2026

314

Səhiyyə Nazirliyi İctimai Səhiyyə və İslahatlar Mərkəzi (İSİM) Ümumdünya Səhiyyə Təşkilatının (ÜST) Azərbaycandakı Ölkə Ofisi ilə əməkdaşlıqla 24-30 aprel Ümumdünya İmmunlaşdırma Həftəsi çərçivəsində silsilə tədbirləri davam etdirir.

Azmedinfo.az xəbər verir ki, növbəti tədbirlər Xətai rayonu 2 saylı uşaq poliklinikasında təşkil olunub və vaksinasiyanın əhəmiyyəti ilə bağlı valideynlər üçün maarifləndirmə sessiyaları keçirilib.

Xətai rayonu 2 saylı uşaq poliklinikasının baş həkimi Sevda Rüstəmova, İSİM-in Monitorinq və təhlil şöbəsinin müdiri İnara Makayeva, müdir müavini Zümrüd Kazımova çıxış edərək bildiriblər ki, əhali arasında aparılan maarifləndirilmənin məqsədi peyvənddən kənarda qalan, peyvəndin vaxtını gecikdirən uşaqların vaksinasiyaya cəlb olunmasıdır. Vurğulanıb ki, onilliklər ərzində peyvəndlər insanları, ailələri və icmaları təhlükəsiz şəkildə qoruyub və bu gün də gələcəyimizi qorumaqda davam edir. Dünya ölkələrində bu il maarifləndirmə kampaniyasının “Hər nəsil üçün peyvəndlər effektivdir” şüarı ilə keçirildiyi və peyvəndlərin həyatın bütün dövrlərini əhatə edən faydaları diqqətə çatdırılıb.

Peyvənd otağında valideynlərə nümunəvi davranışları üçün, övladlarının sağlamlığını vaxtlı-vaxtında peyvəndlərlə möhkəmləndirdiyinə görə sertifikatlar təqdim olunub.

Peyvənd olunan uşaqlara rəmzi hədiyyələr və geniş çeşiddə maarifləndirmə materialları paylanılıb.=