Pasiyent təhlükəsizliyinin artırılması məqsədilə tibbi personal təlim keçdi

03 May 2026

Hacıqabul Rayon Mərkəzi Xəstəxanasında “Yıxılma riskinin qiymətləndirilməsi və qarşısının alınması ilə bağlı görülən tədbirlər” mövzusunda geniş təlim keçirilib.

Azmedinfo.az xəbər verir ki, təlimin əsas məqsədi xəstəxana daxilində pasiyent təhlükəsizliyinin artırılması, yıxılma hallarının qarşısının alınması və bu istiqamətdə tibbi personalın bilik və bacarıqlarının daha da təkmilləşdirilməsi olub.

Təlim Keyfiyyətə nəzarət üzrə komitə rəhbəri Rzayev Kənan tərəfindən aparılıb. Tədbir zamanı yıxılma riskinin müəyyən edilməsi üsulları, risk qrupuna daxil olan pasiyentlərin vaxtında aşkarlanması, düzgün qiymətləndirmə meyarları və profilaktik tədbirlər ətraflı şəkildə izah edilib. Eyni zamanda, xəstəxana şəraitində təhlükəsiz mühitin təşkili, palatalarda və dəhlizlərdə yarana biləcək risk faktorlarının aradan qaldırılması, pasiyentlərin düzgün müşahidəsi və nəzarətdə saxlanılması kimi vacib məqamlar iştirakçıların diqqətinə çatdırılıb.

Təlim çərçivəsində real nümunələr əsasında müzakirələr aparılıb, tibbi heyətin qarşılaşa biləcəyi hallarla bağlı praktiki tövsiyələr verilib və suallar cavablandırılıb. İştirakçılara bildirilib ki, yıxılma hallarının qarşısının alınması yalnız tibbi müdaxilə ilə deyil, eyni zamanda düzgün təşkil olunmuş iş prosesi, diqqət və operativ yanaşma ilə mümkündür.

Sonda qeyd olunub ki, bu cür maarifləndirici tədbirlərin mütəmadi keçirilməsi xəstəxanada xidmət keyfiyyətinin yüksəldilməsinə, pasiyent məmnunluğunun artırılmasına və ümumi təhlükəsizlik səviyyəsinin gücləndirilməsinə mühüm töhfə verir.