Qarabağ Universiteti Tibb və Sağlamlıq Elmləri Fakültəsi klassik tibb təhsilindən fərqli, müasir yanaşmaya əsaslanan yeni təhsil modeli ilə fəaliyyətə başlayıb. Universitetdə tətbiq olunan sistem son 10-15 ildə beynəlxalq təcrübədə sınaqdan keçirilmiş metodologiyalara əsaslanır.

Azmedinfo.az xəbər verir ki, Universitetdə təhsil prosesi üç əsas istiqamət — hibrid, spiral və interprofessional model əsasında qurulub. Klassik sistemdən əsas fərq ondan ibarətdir ki, tibb fakültəsi, tibb bacılığı, diş həkimliyi və əczaçılıq ixtisasları üzrə təhsil alan tələbələr ilk kursdan təməl tibbi elmləri birlikdə öyrənirlər. Bu yanaşma interprofessional təhsilin əsas elementlərindən biri hesab olunur və gələcək səhiyyə mütəxəssislərinin komanda şəklində işləmək bacarığını formalaşdırır. Hibrid təhsil sistemində ənənəvi kafedra anlayışı yoxdur. Müxtəlif ixtisaslardan olan müəllimlər birgə dərs aparır və bu metod tələbələrin mövzuları daha dərindən mənimsəməsinə imkan yaradır.

Spiral təhsil modelində mövzular bir kursda tam yekunlaşmır, əksinə, müxtəlif kurslarda mərhələli şəkildə yenidən tədris olunur. Beləliklə, tələbələr eyni mövzunu hər mərhələdə daha geniş və dərin formada öyrənirlər.

Fakültədə tətbiq olunan yeniliklərdən biri də “tərsinə çevrilmiş sinif” metodudur. Bu sistemdə mövzular əvvəlcədən tələbələrə təqdim edilir, onlar mövzunu müstəqil şəkildə öyrəndikdən sonra həm fərdi, həm də komanda formatında qiymətləndirmədən keçirlər.

Bundan əlavə, Universitetdə birinci kursdan etibarən elmi tədqiqat dərsləri keçirilir və tələbələrə elmi düşüncə bacarıqları aşılanır. Bu yanaşma onların yalnız nəzəri biliklə kifayətlənməməsinə, eyni zamanda tədqiqat yönümlü düşünmə vərdişləri qazanmasına şərait yaradır.

Qarabağ Universiteti Tibb və Sağlamlıq Elmləri Fakültəsinin dekanı və universitet klinikasının baş direktoru Samir Babayev isə bildirib ki, universitet klinikası hazırda sürətli inkişaf mərhələsindədir.

Onun sözlərinə görə, hazırda klinika 109 çarpayılıq imkanla fəaliyyət göstərir və burada 20-dən çox ixtisaslı həkim çalışır. Klinikanın fəaliyyəti üç mərhələ üzrə qurulub. Birinci mərhələdə ambulator xidmətlər, pediatriya, terapiya və cərrahiyyə istiqamətləri üzrə poliklinik xidmətlər istifadəyə verilib. Laboratoriya və radiologiya bölmələri də artıq tam funksional şəkildə fəaliyyət göstərir.

Samir Babayev qeyd edib ki, ikinci mərhələdə təcili yardım xidmətinin açılması nəzərdə tutulur və bu xidmətin iyun ayında istifadəyə verilməsi planlaşdırılır.

Bundan əlavə, ilin sonuna qədər klinikanın əməkdaş sayının 230 nəfərə çatdırılması planlaşdırılır. Həmin dövrdə müəssisənin ambulator, təcili yardım, stasionar və poliklinik xidmətlərlə tam funksional fəaliyyət göstərəcəyi bildirilir.

Baş direktor vurğulayıb ki, klinikada çalışan əməkdaşların böyük hissəsi Qarabağda doğulub boya-başa çatan, bu torpaqlarla mənəvi bağlılığı olan insanlardır.