Ümumdünya Səhiyyə Təşkilatı (ÜST) “EU4Health” aksiyası çərçivəsində Səhiyyə Nazirliyi, TƏBİB, Ekologiya və Təbii Sərvətlər Nazirliyi, həmçinin Qida Təhlükəsizliyi Agentliyi (AQTA) ilə birgə “Azərbaycanda prioritet zoonoz xəstəliklərin riskinin birgə qiymətləndirilməsi” mövzusunda seminar təşkil edib. Bu mühüm tədbir xüsusilə Azərbaycan üçün aktual olan zoonoz xəstəliklərlə bağlı effektiv tərəfdaşlıq platforması yaratmaqla yanaşı, dövlət qurumlarının rəsmi nümayəndələrinin potensialını gücləndirmək baxımından böyük imkanlar yaradır.

Azmedinfo.az xəbər verir ki, seminarın praktiki hissəsində iştirakçılar ölkədə epidemioloji və epizootoloji nəzarətdə saxlanılan brusellyoz, quduzluq və qarayara xəstəlikləri üzrə real risk qiymətləndirmələri aparıblar. Tədbirin ümumi məqsədi prioritet zoonoz xəstəliklər üzrə birgə risk qiymətləndirmələrinin aparılması metodologiyasını formalaşdırmaq və ölkədə bu sahənin idarə olunmasının təkmilləşdirilməsi üçün potensial siyasət variantlarının müəyyən edilməsi üzrə Azərbaycanın milli potensialını artırmaqdır.

Bu çərçivədə qarşıya qoyulan xüsusi məqsədlər isə ilk növbədə iştirakçıların vahid proses daxilində birgə risk qiymətləndirmələrinin aparılması üçün beynəlxalq standartlara əsaslanan 10 addım haqqında tanışlığını və biliklərini artırmaqdan ibarətdir. Bununla yanaşı, müəyyən edilmiş prioritet zoonoz xəstəliklər üçün ilkin birgə risk qiymətləndirməsinin aparılması və bu fəsadların operativ həlli məqsədilə “Vahid Səhiyyə” (One Health) konsepsiyasına uyğun olaraq insan, heyvan və ətraf mühit interfeysində həyata keçirilə bilən potensial risk kommunikasiyası və idarəetmə variantlarının geniş müzakirə olunması prioritet istiqamətlərdəndir.

Seminarın yekun hədəfi kimi prioritet zoonoz xəstəliklər üçün birgə risk qiymətləndirmələrinin aparılması prosesini tam institusionallaşdırmaq məqsədilə həm milli, həm də sub-milli səviyyədə gələcəkdə icra olunacaq təqib tədbirlərinin və strateji yol xəritəsinin təsviri müəyyən edilib.