İyunun 19-da Azərbaycan Pediatrlar Assosiasiyasının təşəbbüsü, Səhiyyə Nazirliyi, TƏBİB və İcbari Tibbi Sığorta üzrə Dövlət Agentliyinin rəsmi dəstəyi ilə Bakıda "Yenidoğulmuşların yeni keysləri" adlı elmi-praktiki kurs təşkil olunacaq.

Azmedinfo.az xəbər verir ki, "Lasomedgroup" şirkətinin texniki dəstəyi ilə gerçəkləşəcək tədbir saat 12:00-da "Badamdar Hotel"də öz işinə başlayacaq.

Tibb dünyasının son yeniliklərini bir araya gətirən kursda sahənin aparıcı mütəxəssisləri tərəfindən yenidoğulmuşlara yanaşmada ən müasir klinik keyslər və praktik biliklər ətraflı şəkildə təqdim ediləcək.

Davamlı Tibbi Təhsil (DTT) çərçivəsində rəsmi akkreditasiya balı ilə qiymətləndiriləcək kursda neonatoloqlar, pediatrlar və ailə həkimlərinin iştirakı nəzərdə tutulub.

Tədbir çərçivəsində iştirakçılar həm nəzəri yeniliklərlə tanış olmaq, həm də gündəlik fəaliyyətlərində tətbiq edə biləcəkləri unikal təcrübələri mənimsəmək imkanı qazanacaqlar.