Professor Gülnaz Dadaşova: Könüllülərimiz gələcəyin uğurlu həkimləri, alimləri və səhiyyə liderləri olacaqlar

07 İyun 2026

Səhiyyə Nazirliyinin Elmi-Tədqiqat Kardiologiya İnstitutunda Türk Dövlətləri Kardio-Onkologiya Konqresi və Birinci Beynəlxalq Süni İntellekt və Robotik Kardiologiya Sammitinin təşkilində fəal iştirak etmiş könüllülərin təltifetmə mərasimi keçirilib.

Azmedinfo.az xəbər verir ki, tədbirdə Elmi-Tədqiqat Kardiologiya İnstitutunun rəhbərliyi, əməkdaşları və könüllülər iştirak ediblər. Bildirilib ki, 20–22 may 2026-cı il tarixlərində Bakı şəhərində keçirilən və 11 ölkədən aparıcı alimləri, beynəlxalq ekspertləri, səhiyyə rəhbərlərini və gənc tədqiqatçıları bir araya gətirən Konqres və Sammitin uğurla təşkilində könüllülərin əməyi xüsusi rol oynayıb.

Mərasimdə çıxış edən Elmi-Tədqiqat Kardiologiya İnstitutunun direktoru, professor Gülnaz Dadaşova könüllülərin tədbirin təşkilati proseslərinə göstərdikləri dəstəyə görə təşəkkürünü bildirib: “Bu gün biz yalnız bir tədbirin uğurunu deyil, həm də gənclərin elmə, səhiyyəyə və beynəlxalq əməkdaşlığa verdiyi töhfəni qeyd edirik. Könüllülərimizin enerjisi, məsuliyyəti və peşəkar yanaşması sayəsində Türk Dövlətləri Kardio-Onkologiya Konqresi və Birinci Beynəlxalq Süni İntellekt və Robotik Kardiologiya Sammiti yüksək səviyyədə təşkil olundu. İnanıram ki, bu gün burada olan gənclər gələcəyin uğurlu həkimləri, alimləri və səhiyyə liderləri olacaqlar.”

Qeyd olunub ki, Sammit çərçivəsində könüllülər qonaqların qarşılanması, iştirakçıların koordinasiyası, elmi sessiyaların təşkili, beynəlxalq nümayəndə heyətlərinin müşayiəti və digər mühüm istiqamətlər üzrə fəal fəaliyyət göstəriblər.

Sonda tədbirin təşkilinə verdikləri töhfəyə görə könüllülərə təşəkkürnamələr təqdim olunub, xatirə şəkilləri çəkdirilib.