Professor Gülnaz Dadaşova: Kardiologiya sahəsindəki müasir tədqiqatlar tibbi xidmətin keyfiyyətini yüksəldir

22 İyun 2026

254

Professor Gülnaz Dadaşova: Kardiologiya sahəsindəki müasir tədqiqatlar tibbi xidmətin keyfiyyətini yüksəldir

19 iyun 2026-cı il tarixində Səhiyyə Nazirliyi Elmi-Tədqiqat Kardiologiya İnstitutunun Elmi Şurasının növbəti iclası keçirilib.

Azmnedinfo.az xəbər verir ki, iclasda institutun elmi fəaliyyətinin inkişafı və yüksəkixtisaslı elmi kadr hazırlığı istiqamətində mühüm məsələlər müzakirə olunub.

İnstitutun direktoru, şuranın sədri, professor Gülnaz Dadaşova çıxışında bildirib ki, elmi fəaliyyətin gücləndirilməsi və gənc tədqiqatçıların dəstəklənməsi müəssisənin əsas prioritet istiqamətlərindəndir: “Kardiologiya sahəsində aparılan müasir elmi tədqiqatlar yalnız nəzəri biliklərin zənginləşməsinə deyil, həm də pasiyentlərə göstərilən tibbi xidmətin keyfiyyətinin yüksəldilməsinə xidmət edir. Elmi potensialın inkişafı və yeni tədqiqatçı nəslinin formalaşdırılması institutumuzun qarşısında duran mühüm vəzifələrdən biridir.”

Gündəlikdə yer alan məsələlər sırasında institutun böyük elmi işçisi Ruslan Nəcəfovun tibb elmləri doktoru elmi dərəcəsi almaq üçün təqdim etdiyi “Preklinik aterosklerozun əmələ gəlməsində, inkişafında və baş verən ağırlaşmalarda müxtəlif risk amillərinin rolu” mövzusunda dissertasiya işinin ilkin müzakirəsi aparılıb.

Bununla yanaşı, institutun doktorantı Günel Abdiyevanın tibb üzrə fəlsəfə doktoru elmi dərəcəsi almaq üçün hazırladığı “Sol mədəciyin kəskin miokard infarktı və sol mədəciyin AF 40%-ə qədər olan pasiyentlərdə finerenonun effektivliyinin öyrənilməsi” mövzusunda dissertasiya işinin təsdiqi məsələsinə baxılıb.

Müzakirələr zamanı təqdim olunan elmi tədqiqatların aktuallığı, praktik əhəmiyyəti və kardiologiya elminin inkişafına verə biləcəyi töhfələr yüksək qiymətləndirilib.

İclasın sonunda gündəlikdə yer alan məsələlər üzrə müvafiq qərarlar qəbul edilib.