“Karl Storz laporoskopik simulyasiya üzrə” seminar

25 İyun 2026

Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin təşkilatçılığı ilə Mərkəzi Gömrük Hospitalının müvafiq şöbələrinin cərrahi ixtisasıları üzrə təhsil alan həkim-rezidentlərinin iştirakı ilə seminar keçirilib.

Azmedinfo.az xəbər verir ki, "Karl Storz laparoskopik simulyasiya” mövzusuna həsr olunan seminarın məqsədi müasir endoskopik avadanlıqlarla iş prinsiplərini mənimsəmək və cərrahiyyədə xəstə təhlükəsizliyini maksimuma çatdıracaq praktiki vərdişləri inkişaf etdirməkdir.

Seminarda Karl Storz Təlim Mərkəzinin Azərbaycan Nümayəndəliyinin direktoru Taley Bəşirov mentor qismində çıxış edərək iştirakçılara laparoskopik cərrahiyyədə simulyatorların rolu, fundamental cərrahi vərdişlərin qazanılması, əl-göz koordinasiyasının inkişafı və cihazlardan səmərəli istifadə qaydaları barədə ətraflı məlumat verib. Daha sonra iştirakçılar virtual mühitdə kəsmə, tikiş tikmə və düyün vurma prinsipləri, cərrahi fəsadların qarşısının alınması barədə praktik bacarıqlar əldə ediblər.

Seminar çərçivəsində laparoskopik cərrahiyyədə komanda işinin qurulması, əməliyyat zamanı yarana biləcək fors-major halların idarə edilməsi və alətlərin texniki qorunma qaydaları müzakirə olunub. Seminar iştirakçıların suallarının cavablandırılması, gənc mütəxəssislərin davamlı peşəkar inkişafında simulyasiya dərslərinin əvəzsiz rolunun vurğulanması və xatirə şəklinin çəkilməsi ilə yekunlaşıb.