TƏBİB-in İcraçı direktorunun müavini Bahadur Rzayevin verdiyi məlumata görə, hazırda onlayn növbə sistemi mərhələli şəkildə genişləndirilir və gələn həftədən etibarən bu sistem artıq daha 6 tibb müəssisəsində tətbiq olunacaq.

Azmedinfo.az xəbər verir ki, B.Rzayevin sözlərinə görə, layihənin ölkə üzrə daha geniş tətbiq edilməsi üçün dövlət satınalması prosesi artıq elan olunub və işlərin ilin sonuna qədər yekunlaşdırılması nəzərdə tutulur. Yeni sistem sayəsində vətəndaşlar əvvəlcədən dəqiq vaxt götürərək tibb müəssisəsinə gələcək, uzun növbələrdə gözləməyəcək və tibbi xidmətə daha rahat çıxış əldə edəcəklər.

Bununla yanaşı, hər bir həkimin gün ərzində qəbul edə biləcəyi pasiyent sayı məhdud olduğundan, vətəndaşların bu məsələni anlayışla qarşılaması vacib hesab olunur.

Hazırkı statistikaya görə, bəzi tibb müəssisələrində onlayn növbə götürən vətəndaşların yalnız 58 faizi həkim qəbuluna gəlir. Bu səbəbdən TƏBİB rəsmisi vətəndaşlara çağırış edərək bildirib ki, qəbula gəlməyəcəkləri təqdirdə növbəni ləğv etsinlər ki, həmin vaxtdan digər ehtiyacı olan vətəndaşlar yararlana bilsinlər.