Öd daşı aşkar edildikdə insanların ilk suallarından biri "Mütləq əməliyyat olunmalıyam?" olur.

Azmedinfo.az xəbər verir ki, qastroenteroloq, hepatoloq və invaziv endoskopist Dr. Aqil Ağakişiyevin sözlərinə görə, bu sualın cavabı daşın yerləşdiyi nahiyədən və yaratdığı şikayətlərdən asılıdır.

Mütəxəssis bildirir ki, əgər daş öd yollarında yerləşirsə, bəzi hallarda onu ERCP (Endoskopik Retroqrad Xolangiopankreatoqrafiya) adlanan endoskopik üsulla cərrahi kəsik aparılmadan çıxarmaq mümkündür. Bu prosedur zamanı ağızdan xüsusi endoskop daxil edilərək öd yollarına çatdırılır və daş xaric edilir.

Dr. Aqil Ağakişiyev qeyd edir ki, daş öd kisəsində yerləşdikdə isə müalicə üsulu daşın ölçüsü, sayı və yaratdığı problemlər nəzərə alınaraq müəyyən edilir. Onun sözlərinə görə, bəzi hallarda xəstənin müşahidə altında saxlanılması kifayət edir, digər hallarda isə cərrahi müdaxilə tövsiyə olunur.

Ekspert vurğulayır ki, bəzi insanlarda öd daşı uzun illər ərzində heç bir narahatlıq yaratmaya bilər. Lakin digər xəstələrdə sağ qabırğaaltı nahiyədə ağrı, ürəkbulanma, qusma, qızdırma və ya sarılıq kimi əlamətlər müşahidə oluna bilər.

Mütəxəssis sonda xatırladır ki, öd daşı diaqnozu hər zaman əməliyyat zərurəti demək deyil. Ən uyğun müalicə taktikası yalnız həkim müayinəsi və müvafiq diaqnostik nəticələr əsasında seçilməlidir.