Son günlər rəqəmsal platformalarda və sosial şəbəkələrdə Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən tibb müəssisələrinə onlayn növbə götürülməsini təklif edən bəzi qeyri-rəsmi internet resurslarına və tətbiqlərə rast gəlinir.

Azmedinfo.az-a verilən məlumata görə, vətəndaşların təhlükəsizliyi və fərdi məlumatlarının qorunması məqsədilə TƏBİB rəsmi olaraq xəbərdarlıq edir ki, bu növ kənar platformaların qurumun rəsmi fəaliyyəti ilə heç bir əlaqəsi yoxdur.

Xatırladırıq ki, ölkə daxilindəki dövlət tibb müəssisələrində həkim qəbuluna onlayn növbənin əldə edilməsi yalnız və eksklüziv olaraq “mygov” mobil tətbiqi vasitəsilə həyata keçirilir. Milli rəqəmsal sistemlərə inteqrasiya olunmamış şübhəli və qeyri-rəsmi keçidlərdən istifadə etmək vətəndaşların şəxsi məlumatlarının sızmasına, saxta növbə statusu alaraq xəstəxanalarda vaxt itirməsinə və tamamilə ödənişsiz olan bu xidmət müqabilində bəzi dələduz platformalara əbəs yerə vəsait ödəməsinə yol aça bilər.

Vətəndaşlar tam təhlükəsiz və sürətli şəkildə həkim qəbuluna yazılmaq üçün smartfonlarına “mygov” mobil tətbiqini yükləməli, müvafiq dövlət xidmətləri bölməsindən TƏBİB-in onlayn növbə modulunu seçərək real vaxt rejimində uyğun həkim və qəbul saatını asanlıqla təyin etməlidirlər.

TƏBİB əhalini kiber-təhlükələrdən qorunmaq üçün ayıq-sayıq olmağa, kənar şəxslərin təqdim etdiyi şübhəli linklərə daxil olmamağa və yalnız rəsmi dövlət tətbiqi olan “mygov” platformasına etibar etməyə çağırır.