Azərbaycan Respublikası Səhiyyə Nazirliyinin Elmi-Tədqiqat Kardiologiya İnstitutunda (ETKİ) “Ürək çatışmazlığında yeniliklər: 2026” mövzusunda elmi seminar keçirilib.

Azmedinfo.az xəbər verir ki, İnstitutun direktoru, professor Gülnaz Dadaşovanın sədrliyi ilə baş tutan tədbirdə tibb elmləri doktoru Azad Hacıyev məruzə ilə çıxış edib. Məruzəçi ürək çatışmazlığının diaqnostikası və müalicəsindəki son elmi yeniliklər, beynəlxalq klinik tövsiyələrdəki dəyişikliklər, müasir dərman terapiyası, cihazla müalicə üsulları və xəstələrin uzunmüddətli izlənməsi ilə bağlı aktual məlumatları iştirakçıların diqqətinə çatdırıb.

Seminarda institutun həkimləri, rezidentləri və elmi əməkdaşları iştirak edərək mövzu ətrafında geniş fikir mübadiləsi aparıblar. Müzakirələr zamanı ürək çatışmazlığının idarə olunmasında multidissiplinar yanaşmanın əhəmiyyəti, erkən diaqnostikanın rolu və müasir müalicə strategiyalarının tətbiqi məsələlərinə xüsusi toxunulub.

 

Tədbirdə çıxış edən professor Gülnaz Dadaşova ürək çatışmazlığının bütün dünyada səhiyyə sisteminin ən başlıca çağırışlarından biri olduğunu vurğulayıb. O, xəstəliyin vaxtında aşkar edilməsinin və müasir protokollara uyğun idarə olunmasının insan ömrünün uzadılmasında həlledici rol oynadığını bildirib. Eyni zamanda, institutda keçirilən bu cür seminarların yerli kardioloqların beynəlxalq təcrübəyə inteqrasiyasına böyük təkan verdiyini diqqətə çatdırıb.

Seminar iştirakçıların suallarının cavablandırılması və elmi müzakirələrlə yekunlaşıb.