Dövlət Tibbi Sığorta və Ekspertiza Agentliyində Qlobal Fond nümayəndələri ilə əməkdaşlıq müzakirə olunub

26 İyul 2026

238

Dövlət Tibbi Sığorta və Ekspertiza Agentliyində Qlobal Fond nümayəndələri ilə əməkdaşlıq müzakirə olunub

Dövlət Tibbi Sığorta və Ekspertiza Agentliyində Qlobal Fondun Şərqi Avropa və Mərkəzi Asiya üzrə Baş Fond Portfolio Meneceri Valeriya Qrişeçkinanın rəhbərlik etdiyi nümayəndə heyəti ilə görüş keçirilib.

Azmedinfo.az xəbər verir ki, görüşdə Səhiyyə Nazirliyinin İİV/QİÇS, vərəm və malyariya ilə mübarizə üzrə proqramının Layihə Əlaqələndirmə Bürosunun direktoru Yaşar Orucov da iştirak edib.

Tərəflər səhiyyə sahəsində Azərbaycanla Qlobal Fond arasında davam edən əməkdaşlığın nəticələrini və gələcək birgə təşəbbüsləri müzakirə ediblər.

İdarə Heyətinin sədr müavini Rəşad Məhərrəmov Agentlikdə həyata keçirilən əsas institusional, funksional və strateji dəyişikliklər, eləcə də qarşıdakı inkişaf prioritetləri barədə məlumat verib. Son illər əlilliyin qiymətləndirilməsi, müddətli həqiqi hərbi xidmətə çağırılan vətəndaşların yekun tibbi müayinəsi sahəsində aparılan islahatları diqqətə çatdırıb.

R.Məhərrəmov Azərbaycanın Qlobal Fondla əməkdaşlığa hər zaman önəm verdiyini, 2005-ci ildən etibarən QİÇS, vərəm və malyariya ilə mübarizə üzrə fəaliyyətlərin uğurla davam etdiyini vurğulayıb.

Valeriya Qrişeçkina da öz növbəsində Azərbaycanda səhiyyə infrastrukturunun təkmilləşdirilməsi, QİÇS/İİV və vərəm kimi xəstəliklərin profilaktikası, erkən diaqnostikası və müalicəsi proqramlarının nəticələrini yüksək qiymətləndirib və qarşılıqlı əməkdaşlıq imkanları barədə fikirlərini bildirib.

Tərəflər qarşılıqlı əməkdaşlığın gücləndirilməsi və gələcək birgə layihələrin hazırlanması üzrə müzakirələr aparıblar.