Yeni Klinikada Azərbaycan Hepato-Pankreato-Biliar Cərrahlar İctimai Birliyi tərəfindən Azərbaycan Respublikasının QHT-lərə Dövlət Dəstəyi Agentliyinin dəstəyi ilə həyata keçirilən "Qaraciyər sağlamlığı və transplantasiya mövzusunda maarifləndirmə" layihəsi çərçivəsində növbəti maarifləndirici tədbir təşkil olunub.

Azmedinfo.az xəbər verir ki, tədbirin açılışında çıxış edən Azərbaycan Hepato-Pankreato-Biliar Cərrahlar İctimai Birliyinin sədri Eldar Əhmədov ölkədə orqan transplantasiyası sahəsində son illər əldə olunan nailiyyətlərdən danışıb. O bildirib ki, həyata keçirilən islahatlar nəticəsində transplantasiya xidməti yeni inkişaf mərhələsinə qədəm qoyub və bu istiqamətdə görülən işlər gələcək üçün mühüm perspektivlər yaradır.

Açılış nitqi ilə çıxış edən Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova ölkədə orqan donorluğu və transplantasiya sahəsində görülən işlər, eləcə də əldə olunan nəticələr barədə məlumat verib. O qeyd edib ki, ötən il ölkədə 56, cari ildə isə indiyədək 26 vəfat etmiş donordan orqan və toxumalar götürülərək transplantasiyaya ehtiyacı olan xəstələrə uğurla köçürülüb.

Yeganə Abbasova vurğulayıb ki, orqan donorluğunun inkişafında maarifləndirmə tədbirləri xüsusi əhəmiyyət daşıyır. Onun sözlərinə görə, cəmiyyətin düzgün məlumatlandırılması, donor mədəniyyətinin təşviqi və orqan bağışlanmasına müsbət ictimai münasibətin formalaşdırılması transplantasiya sahəsinin inkişafının əsas prioritetlərindəndir.

Tədbir çərçivəsində Orqan Donorluğu və Transplantasiyası üzrə Koordinasiya Mərkəzinin İdarə Heyəti sədrinin müavini Günay Abbasova "Donor ol, həyat bəxş et" mövzusunda təqdimatla çıxış edib. O, orqan donorluğu və transplantasiya prosesi ilə bağlı cəmiyyətdə mövcud olan yanlış təsəvvürlərə aydınlıq gətirib, donor orqan transplantasiyasının mərhələləri, resipiyentlərin qeydiyyatı, tibbi müayinələr və donor seçimi haqqında ətraflı məlumat verib.

Maarifləndirici tədbirdə transplantasiya üzrə koordinator İntizar Məmmədova "Qaraciyər transplantasiyası: Yeni həyata açılan qapı", həkim-dietoloq Gülnar Abdullayeva "Qaraciyərin qorunmasında qidalanmanın rolu", infeksionist Səxavət Xəlilli "Hepatit B" və həkim-rezident Gülnar Hüseynova "Alkoqolla əlaqəli qaraciyər xəstəliyi" mövzularında təqdimatlarla çıxış edərək iştirakçıları aktual tibbi məlumatlarla tanış ediblər.

Tədbirin sonunda iştirakçıların sualları cavablandırılıb, mövzu ətrafında geniş fikir mübadiləsi aparılıb. Bildirilib ki, bu cür maarifləndirici tədbirlər əhalinin qaraciyər sağlamlığı, orqan donorluğu və transplantasiya haqqında məlumatlılığının artırılmasına, cəmiyyətdə donor mədəniyyətinin formalaşmasına mühüm töhfə verir.