İlin ilk yarısında Azərbaycanda minlərlə insan heyvan dişləməsi səbəbilə tibbi yardıma müraciət edib. Hadisələrin böyük hissəsini it və pişik dişləmələri təşkil edir.

Azmedinfo.az xəbər verir ki, bunu Səhiyyə Nazirliyi Respublika Gigiyena və Epidemiologiya Mərkəzinin Xüsusi təhlükəli infeksiyalar şöbəsinin müdiri Aytəkin Qurbanova bildirib.

Onun sözlərinə görə, 2026-cı ilin ilk altı ayı ərzində ölkə üzrə 23 mindən çox heyvan dişləməsi qeydə alınıb. Hadisələrin 11 670-i məlum heyvanlar (it, pişik), 11 108-i isə naməlum heyvanlar (it, pişik, siçovul) tərəfindən törədilib.

Aytəkin Qurbanova qeyd edib ki, müraciətlərin təxminən 85 faizi it və pişik dişləmələrinin payına düşür. Digər hallarda isə canavar, çaqqal, at, inək, kirpi və digər heyvanlarla bağlı xəsarətlər qeydə alınıb.

Heyvan dişləməsinə məruz qalan şəxslərin quduzluq xəstəliyinə qarşı antirabik vaksinlə təmin edildiyini bildirən şöbə müdiri hazırda tibb müəssisələrində kifayət qədər vaksin ehtiyatının olduğunu vurğulayıb.