Tibb işçilərinin sertifikasiyası cəza və ya təzyiq mexanizmi kimi qiymətləndirilməməlidir. Bu prosesin əsas məqsədi tibb mütəxəssislərinin davamlı peşəkar inkişafını təmin etmək və əhaliyə göstərilən tibbi xidmətin keyfiyyətini yüksəltməkdir.

Azmedinfo.az xəbər verir ki, bu fikirləri Səhiyyə naziri Teymur Musayev AzTV və “Trend”ə verdiyi müsahibəsində bildirib.

Nazir qeyd edib ki, “Əhalinin sağlamlığının qorunması haqqında” Qanuna edilən son dəyişikliklərə əsasən, tibb işçilərinə sertifikasiya prosesində seçim imkanı yaradılıb. Artıq həkimlər və tibb mütəxəssisləri hər 5 ildən bir keçirilən ənənəvi imtahanla yanaşı, alternatif yoldan da istifadə edə biləcəklər. Belə ki, onlar 5 il ərzində Davamlı Peşəkar İnkişaf proqramı üzrə ümumilikdə 250-dən az olmayaraq kredit balı toplamaqla sertifikat əldə etmək hüququ qazanıblar.

Teymur Musayev Səhiyyə Nazirliyi tərəfindən sertifikasiya sual bazasının mütəmadi olaraq yeniləndiyini və bura müasir müalicə metodlarına dair məlumatların daxil edildiyini diqqətə çatdırıb. Nazir bildirib ki, hər il kredit balı toplamağa vaxtı olmayan və yalnız imtahan vermək istəyən mütəxəssislər üçün yaxın vaxtlarda xüsusi rəqəmsal tətbiq istifadəyə veriləcək.

Yaradılacaq yeni tətbiqdə bütün sual bazası ictimaiyyətə açıq olacaq. Tətbiqdə hər bir sualın düzgün cavabı ilə yanaşı, onun akademik izahı da yer alacaq. Bunun sayəsində tibb işçiləri əlavə ədəbiyyat axtarmağa ehtiyac qalmadan cavabların elmi əsaslandırılmasını birbaşa platforma üzərindən öyrənə biləcəklər.