Meşə və digər yaşıllıq ərazilərində yanğınların qarşısının alınması, eləcə də əhalinin yanğın təhlükəsizliyi sahəsində maarifləndirilməsi məqsədilə Ekologiya və Təbii Sərvətlər Nazirliyinin regional idarələri tərəfindən ölkənin müxtəlif bölgələrində növbəti maarifləndirici tədbirlər təşkil olunub.

Azmedinfo.az nazirliyin məlumatına istinadən yazır ki, tədbirlər Ucar Rayon İcra Hakimiyyətində, Zərdab Rayon Gənclər Evində, Altıağac Milli Parkında, eləcə də Qazax rayonunun Kosalar, Çaylı və Fərəhli kəndlərində keçirilib.

Yerli icra hakimiyyəti orqanlarının, aidiyyəti dövlət qurumlarının, bələdiyyələrin, fermerlərin və yerli sakinlərin iştirakı ilə keçirilən görüşlərdə meşə yanğınlarının qarşısının alınması, yanğın təhlükəsizliyi qaydalarına əməl olunmasının vacibliyi, yanğın zamanı ilkin müdaxilə üsulları, habelə qurumlararası əməkdaşlığın əhəmiyyəti barədə ətraflı məlumat verilib.

Tədbirlərdə iştirakçılar mövzu ilə bağlı maarifləndirici materiallarla da təmin olunub, onların sualları cavablandırılıb və yanğın təhlükəsizliyi sahəsində fərdi məsuliyyətin artırılmasının əhəmiyyəti vurğulanıb.