Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva 21 Sentyabr – Beynəlxalq Sülh Günü münasibətilə ənənəvi "Sülh Aylığı"nın elan olunması ilə bağlı müraciət yayıb.

Azmedinfo.az xəbər verir ki, BMT Baş Assambleyası tərəfindən 2026-cı il üçün müəyyən edilmiş "Sülhə sərmayə qoyaq – hər kəs üçün, hər yerdə, hər gün" devizinə diqqət çəkən Ombudsman qeyd edib ki, davamlı sülh yalnız müharibənin olmaması ilə deyil, həm də insan hüquqlarına hörmət, ədalət, bərabərlik və dialoq mədəniyyətinin təşviqi ilə təmin olunur.

Müraciətdə 2025-ci il 8 avqustda Vaşinqtonda Azərbaycan ilə Ermənistan arasında sülh sazişinin razılaşdırılmış mətninin paraflanması və 2026-cı ilin yanvarında Davosda ölkəmizin Sülh Şurasına təsisçi üzv kimi qoşulması regional və qlobal sabitliyə verilən mühüm töhfələr kimi xüsusi vurğulanıb. Bununla yanaşı, davamlı sülh üçün mina və partlamamış hərbi sursat təhlükəsinin aradan qaldırılmasının, itkin düşmüş şəxslərin taleyinə aydınlıq gətirilməsinin və keçmiş məcburi köçkünlərin təhlükəsiz qayıdışının təmin edilməsinin vacib şərt olduğu bildirilib.

Elan edilən aylığın əsas məqsədi cəmiyyətdə insan hüquqları və sülh mədəniyyəti üzrə maarifləndirməni gücləndirmək, qarşılıqlı etimad mühitini möhkəmləndirmək, xüsusilə uşaq və gənclər arasında dözümlülük və həmrəylik dəyərlərini aşılamaqdır. Bu çərçivədə Ombudsman dövlət və bələdiyyə orqanlarını, vətəndaş cəmiyyəti institutlarını, media nümayəndələrini, təhsil, mədəniyyət və səhiyyə müəssisələrini, eləcə də geniş ictimaiyyəti maarifləndirici konfranslar, seminarlar, dəyirmi masalar, müsabiqə və sərgilər təşkil etməyə çağırıb, həmçinin fəaliyyətlərin mediada və sosial platformalarda #SülhAylığı və #PeaceMonth həştəqləri ilə işıqlandırılmasını tövsiyə edib.