Hər il 21 sentyabr dünyada Altsheymer xəstəliyi və demensiya haqqında cəmiyyətin məlumatlılığının artırılması məqsədilə Ümumdünya Altsheymer Xəstəliyi ilə bağlı Məlumatlandırma Günü kimi qeyd olunur. Bu tarix 2012-ci ildən etibarən xəstəlik barədə maarifləndirmənin gücləndirilməsi, erkən diaqnostikanın əhəmiyyətinin diqqətə çatdırılması və xəstələrin, eləcə də onlara qulluq edən insanların üzləşdiyi çətinliklərə diqqətin artırılması baxımından xüsusi əhəmiyyət daşıyır.

Azmedinfo.az məlumatlandırma günündə xəstəlik, onun əsas əlamətləri və erkən diaqnostikanın əhəmiyyəti barədə izləyicilərini məlumatlandırır.

Altsheymer xəstəliyi beynin fəaliyyətinə təsir edən, yaddaş, düşünmə və digər koqnitiv qabiliyyətlərin tədricən zəifləməsinə səbəb olan proqressiv xəstəlikdir. Xəstəlik çox vaxt ilkin mərhələdə adi unutqanlıqla qarışdırıla bilər. Lakin yaşla əlaqədar yaranan adi unutqanlıqdan fərqli olaraq, Altsheymer zamanı yaddaş pozuntuları gündəlik həyata getdikcə daha ciddi təsir göstərir.

Xəstəliyin ən erkən və geniş yayılmış əlamətlərindən biri yaxın zamanda baş vermiş hadisələri və yeni öyrənilən məlumatları xatırlamaqda çətinlikdir. İnsan eyni sualı dəfələrlə verə, yaxınlarda baş vermiş hadisələri unuda və gündəlik işlərini əvvəlki kimi müstəqil şəkildə yerinə yetirməkdə çətinlik çəkə bilər. Xəstəlik irəlilədikcə zaman və məkan anlayışında çaşqınlıq, tanış yerlərdə istiqaməti müəyyənləşdirməkdə çətinlik, sözləri düzgün ifadə edə bilməmək və qərarvermə qabiliyyətinin zəifləməsi kimi əlamətlər də müşahidə oluna bilər.

Altsheymer yalnız xəstənin öz həyatına deyil, ailə üzvlərinə və ona qulluq edən şəxslərə də ciddi təsir göstərir. Xəstəliyin irəliləməsi ilə gündəlik qayğıya ehtiyac artdığından baxıcılar həm fiziki, həm də emosional baxımdan müxtəlif çətinliklərlə üzləşə bilirlər. Buna görə də Altsheymer xəstəliyinə yalnız tibbi problem kimi deyil, həm də ailə və cəmiyyət üçün mühüm sosial məsələ kimi yanaşılması vacibdir.

Məlumatlılığın artırılması xəstəliyin əlamətlərinin vaxtında tanınmasına və tibbi müayinəyə müraciətin gecikdirilməməsinə kömək edə bilər. Erkən diaqnoz xəstənin vəziyyətinin qiymətləndirilməsi, mövcud müalicə və dəstək imkanlarından vaxtında yararlanılması, həmçinin xəstənin və ailəsinin gələcək mərhələlərə daha yaxşı hazırlaşması baxımından əhəmiyyətlidir.

Ümumdünya Altsheymer Xəstəliyi ilə bağlı Məlumatlandırma Gününün əsas mesajlarından biri də yaddaşda davamlı və gündəlik həyata təsir edən dəyişikliklərin yaşlanmanın adi nəticəsi kimi qəbul edilməməsidir. Belə hallar müşahidə olunduqda həkimə müraciət etmək və müvafiq müayinələrdən keçmək vacibdir.

Bu gün cəmiyyətə Altsheymer xəstəliyi haqqında daha çox məlumat əldə etməyin, xəstələrə anlayış və dəstək göstərməyin, onların hüquq və ləyaqətinə hörmətlə yanaşmağın vacibliyini xatırladır. Maarifləndirmə və erkən müraciət xəstəliklə mübarizədə mühüm addımlardan biridir.