Səhiyyə Nazirliyinin Elmi-Tədqiqat Ağciyər Xəstəlikləri İnstitutunun baş direktoru İradə Axundova 18–22 sentyabr 2026-cı il tarixlərində Çin Xalq Respublikasının Çjençjou şəhərində keçirilən “Global MicroLab Talk 2026” beynəlxalq forumunda iştirak edib.

Azmedinfo.az xəbər verir ki, Azərbaycan Respublikasında “Autobio” şirkətini təmsil edən “Labservis Ltd” şirkətinin dəvəti ilə keçirilən forumda müxtəlif ölkələrdən klinik laboratoriya təbabəti, mikrobiologiya, laborator diaqnostika və səhiyyə sahəsində fəaliyyət göstərən mütəxəssislər bir araya gəlib.

Forumun əsas məqsədi laboratoriya təbabəti və mikrobioloji diaqnostika sahəsində müasir yanaşmaların, qabaqcıl texnologiyaların və innovativ həllərin təqdim edilməsi, beynəlxalq təcrübə mübadiləsinin aparılması və mütəxəssislər arasında əməkdaşlığın genişləndirilməsi olub.

Tədbir çərçivəsində müasir laborator diaqnostika texnologiyaları, mikrobioloji müayinələrin aparılması, diaqnostik proseslərin təkmilləşdirilməsi, laboratoriyalarda keyfiyyətin idarə olunması və innovativ tibbi texnologiyaların tətbiqi ilə bağlı təqdimatlar və elmi sessiyalar keçirilib.

Forumda laboratoriya xidmətlərinin inkişafı, diaqnostik imkanların genişləndirilməsi və müasir texnologiyaların səhiyyə sisteminə inteqrasiyası istiqamətində yeniliklər barədə məlumatlar təqdim olunub. Həmçinin müxtəlif ölkələrin mütəxəssisləri arasında fikir və təcrübə mübadiləsi aparılıb.