Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda (ETPİ) əməkdaşlıq müqaviləsi çərçivəsində Özbəkistandan olan nümayəndə heyəti qonaq olub.

Azmedinfo.az xəbər verir ki, görüşdə Səmərqənd Dövlət Tibb Universitetinin Uşaq Cərrahiyyəsi Klinikasının baş həkimi, Uşaq Cərrahiyyəsi kafedrasının müdiri professor Cəmşid Şəmsiyev və Səmərqənd uşaq hospisinin baş həkimi, nevroloq dosent Saodat İgamova iştirak ediblər.

Səfər çərçivəsində professor C. Şəmsiyev İnstitutun bütün klinik şöbələri ilə yaxından tanış olaraq, tibbi xidmətin təşkili, müalicə-diaqnostika imkanları və şöbələrin fəaliyyəti barədə məlumat alıb. O, həmçinin mürəkkəb və çətin diaqnostikası olan xəstələrin müalicə prinsiplərini incələyib, həkimlərlə birlikdə xəstələrin klinik xüsusiyyətlərini və müalicə prosesini müzakirə edib. Görüş əsnasında uşaq cərrahiyyəsi sahəsindəki aktual hallar üzrə fikir mübadiləsi aparılıb.

Müzakirələr zamanı pediatriya və uşaq cərrahiyyəsi istiqamətində peşəkar əlaqələrin genişləndirilməsi və gələcək əməkdaşlığın inkişaf etdirilməsinin vacibliyi vurğulanıb. Əməkdaşlıq planına əsasən, Səmərqənd Dövlət Tibb Universitetinin tibbi personalının ETPİ-nin təcrübəsindən bəhrələnməsi və kadr hazırlığı istiqamətində qarşılıqlı təcrübə mübadiləsinin davam etdirilməsi nəzərdə tutulur.