İSİM-in də təşkilatçılar sırasında olduğu I Bakı Beynəlxalq İnklüziv Konfransı keçirilib

17 Oktyabr 2026

130

15-16 oktyabr 2026-cı ildə Bakı şəhərində I Beynəlxalq İnklüziv Məşğulluq Konfransı keçirilib.

Azmedinfo.az xəbər verir ki, Alyona Əliyevanın iştirak etdiyi tədbir autizmli və digər əlilliyi olan şəxslərin əmək bazarına inteqrasiyasının gücləndirilməsi istiqamətində Azərbaycanın ən genişmiqyaslı beynəlxalq platformalarından biri olub.

Konfrans dünyanın müxtəlif ölkələrindən tanınmış ekspertləri, dövlət qurumları, beynəlxalq təşkilatlar və özəl sektor nümayəndələrini, akademik dairələri və vətəndaş cəmiyyəti institutlarını bir araya gətirib.

Konfransın əsas məqsədi inklüziv məşğulluq sahəsində beynəlxalq təcrübənin Azərbaycanda tətbiqini təşviq etmək, dövlət–özəl sektor əməkdaşlığını genişləndirmək, işəgötürənləri əlçatan və inklüziv iş mühitinin yaradılması istiqamətində maarifləndirmək, eləcə də autizmli və digər əlilliyi olan şəxslərin dayanıqlı məşğulluq imkanlarının artırılmasına töhfə verməkdir.

Konfrans Heydər Əliyev Fondu, Azərbaycan Respublikası Elm və Təhsil Nazirliyi, Azərbaycan Respublikası Səhiyyə Nazirliyi, İctimai Səhiyyə və İslahatlar Mərkəzi, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi, “Regional İnkişaf” İctimai Birliyi və “Birgə və Sağlam” İctimai Birliyi tərəfindən təşkil olunub.

Konfransın ilk günündə tədbirin rəsmi açılış mərasimi keçirilib.

Səhiyyə Nazirliyi İctimai Səhiyyə və İslahatlar Mərkəzinin direktoru Səbinə Babazadə açılışda çıxış edərək bildirib ki, səhiyyə işçilərinin məqsədi yalnız xəstəliklərlə mübarizə deyil, həm də həyat keyfiyyətinin artırılması və hər bir vətəndaşın cəmiyyətdə özünə layiq yer tutmasıdır. O, konfransın işini yüksək qiymətləndirərək autizmli və xüsusi qayğıya ehtiyacı olan digər şəxslərin əmək bazarına inteqrasiyasının onların potensialından səmərəli istifadəyə geniş yol açdığını vurğulayıb.

İki gün davam edən konfransda Azərbaycanın aparıcı dövlət qurumları və özəl sektor nümayəndələri inklüziv məşğulluq sahəsində həyata keçirdikləri təşəbbüsləri və uğurlu təcrübələri təqdim ediblər. ABŞ, İrlandiya, Fransa, Türkiyə və digər ölkələrdən tanınmış mütəxəssislər geniş təqdimatlarla çıxış edərək beynəlxalq təcrübəni və qabaqcıl yanaşmaları diqqətə çatdırıblar.