Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunun direktoru institutda müalicə alan şəhid ailəsinin övladlarının səhhəti ilə maraqlanıb, onların nənəsi, şəhid Əliyev Orxan Məhəmməd oğlunun anası ilə görüşüb.

Azmedinfo.az xəbər verir ki, görüş zamanı uşaqların sağlamlıq vəziyyəti, müalicə prosesi və ümumi durumu barədə məlumat verilib. Direktor uşaqların sağlamlıqlarının bərpası istiqamətində göstərilən tibbi xidmətlərlə maraqlanıb, müalicələrinin diqqətdə saxlanılmasının vacibliyini vurğulayıb və göstərilən tibbi xidmətlərin keyfiyyəti ilə bağlı şəhid ailəsinin fikirlərini dinləyib.

Görüşdə şəhid ailələrinə xüsusi diqqət və qayğı göstərilməsinin əhəmiyyəti qeyd olunub. Şəhid anası ilə səmimi söhbət aparılıb, onun qayğıları və istəkləri dinlənilib.

Elmi-Tədqiqat Pediatriya İnstitutu şəhid və qazi ailələrinə diqqət və qayğının göstərilməsini, uşaqların sağlamlığının qorunmasını və onların keyfiyyətli tibbi xidmətlə təmin olunmasını daim prioritet istiqamətlərdən biri kimi diqqətdə saxlayır.