Tibbi Profilaktika İnstitutunda elmi fəaliyyətin qiymətləndirilməsi mövzusunda seminar keçirilib

Azmedinfo.az xəbər verir ki, Səhiyyə Nazirliyi V.Y.Axundov adına Elmi-Tədqiqat Tibbi Profilaktika İnstitutunda elmi seminar keçirilib. Seminar elmi katib, professor Ağasəmid İsayevin sədrliyi ilə baş tutub.

Tədbirdə institutun direktoru, professor Adil Allahverdiyev də iştirak edərək çıxış edib. O, elmi fəaliyyətin obyektiv və şəffaf şəkildə qiymətləndirilməsinin əhəmiyyətinə diqqət çəkib və bu kimi seminarların elmi işçilərin bilik və peşəkar bacarıqlarının inkişafında mühüm rol oynadığını bildirib.

Seminarda institutun Gen mühəndisliyi və biotexnologiya şöbəsinin müdiri Nərgiz İmamova “Elmi fəaliyyətin qiymətləndirilməsində istifadə olunan göstəricilər” mövzusunda məruzə ilə çıxış edib. Məruzədə beynəlxalq elmi ictimaiyyətdə geniş istifadə olunan əsas bibliometrik bazalar – o cümlədən Scopus, Web of Science, Google Scholar kimi platformalarda təqdim edilən elmi metrik göstəricilər haqqında geniş məlumat verilib.

Seminar iştirakçıları təqdim olunan məruzə ətrafında fikir mübadiləsi apararaq aktual suallarını səsləndiriblər. Tədbirin sonunda gələcəkdə bu istiqamətdə praktik təlimlərin və təcrübə mübadilələrinin davam etdirilməsinin vacibliyi vurğulanıb.