Ölkəmizdə minimal invaziv cərrahiyyənin inkişafı məsələləri müzakirə edildi

Ölkəmizdə minimal invaziv cərrahiyyənin inkişafı məsələləri müzakirə edildi

13 Fevral 2025

618

TƏBİB, Azərbaycan Minimal İnvaziv Cərrahlar Cəmiyyəti və “Almaz Akademie” Tibbi Treninq Mərkəzinin təşkilatçılığı ilə Qusar rayonunda “Minimal invaziv cərrahiyyədə son nailiyyətlər” adlı regional konfrans keçirilib.

Azmedinfo.az xəbər verir ki, konfransa TƏBİB-in tabeliyində fəaliyyət göstərən tibb müəssisələrindən 100-ə yaxın iştirakçı qatılıb. OKİ hospitalında keçirilən tədbir çərçivəsində minimal invaziv cərrahiyyənin müxtəlif sahələri – laparoskopik və ümumi cərrahiyyə, ginekologiya, urologiya, diaqnostik və müalicəvi endoskopiya, invaziv radiologiya üzrə aktual problemlərə həsr olunmuş məruzələr dinlənilib.

Konfrans çərçivəsində TƏBİB-in İcraçı direktorunun müavini Araz Nəsirov, Milli Məclisin Səhiyyə Komitəsinin sədr müavini professor Rəşad Mahmudov, İqtisadiyyat Komitəsinin sədr müavini Azər Badamov, Azərbaycan Minimal İnvaziv Cərrahlar Cəmiyyətinin və “Almaz Akademie” Tibbi Treninq Mərkəzinin prezidenti professor Qurbanxan Müslümov, həmçinin AMİCC İdarə Heyətinin sədri Əli Allahverdiyevin moderatorluğu ilə “Regionlarda minimal invaziv cərrahiyyənin inkişafı üçün nə etməli?” mövzusunda panel müzakirələr keçirilib.

Bundan başqa, tədbirdə iştirakçılar üçün praktiki “Hands-On Workshops” və ustad dərsləri təşkil olunub. Canlı yayım vasitəsilə prof. İslam Mahalov tərəfindən "Laparoskpik total histerektomiya", prof. Qurbanxan Müslümov və dr. Vüqar Behbudov tərəfindən "Laparoskopik xolesistektomiya", dr. Həmzət Cigərov tərəfindən litotripsiya əməliyyatı, dr. Zöhrə Azadova tərəfindən "Lazer proktoloji əməliyyatlar", dr. Həcər Həsənova tərəfindən "Endoskopik prosedurlar" əməliyyatları icra edilib və iştirakçılar üçün zala translyasiya edilib.

Konfransın gələcəkdə hər il bir dəfə Qusarda keçirilməsi təklif olunub və bu istiqamətdə region klinikaları, OKİ Hospital, Azərbaycan Minimal İnvaziv Cərrahlar Cəmiyyəti və “Almaz Akademie” Tibbi Treninq Mərkəzi arasında müzakirələr aparılıb.

Tədbirin sonunda iştirakçılara sertifikatlar təqdim edilib.