Azərbaycan Respublikası Səhiyyə Nazirliyi Akademik C.M. Abdullayev adına Elmi-Tədqiqat Kardiologiya İnstitutu (ETKİ) 2025-2026-cı tədris ili üçün doktorantura üzrə qəbul elan edir.

Azmedinfo.az xəbər verir ki, bu barədə ETKİ-nin rəsmi məlumatı yayımlanıb.

Məlumatda bildirilir ki, qəbul Azərbaycan Respublikası Nazirlər Kabinetinin 2025-ci il 2 may tarixli 275s nömrəli Sərəncamı ilə təsdiq edilmiş "Azərbaycan Respublikasının ali təhsil müəssisələrinin, elmi müəssisə və təşkilatlarının 2025-ci il üçün doktorant hazırlığı üzrə qəbul planları" və Nazirlər Kabinetinin 2010-cu il 10 iyul tarixli 129 nömrəli qərarı ilə təsdiq edilmiş "Doktoranturaların yaradılması və doktoranturaya qəbul Qaydaları"na uyğun olaraq həyata keçiriləcəkdir.

Hazırda ETKİ üzrə tibb üzrə fəlsəfə doktoru ixtisası üçün 2 qiyabi yer ayrılmışdır.

Doktoranturaya qəbul olmaq istəyən şəxslər ETKİ-nin müəyyən etdiyi qaydalar və tələblərlə tanış olmalı və müvafiq sənədləri təqdim etməlidirlər. Qəbul prosesi barədə ətraflı məlumat yaxın günlərdə ETKİ-nin rəsmi internet səhifəsində və digər məlumat kanallarında yayımlanacaqdır.

Akademik C.M. Abdullayev adına Elmi-Tədqiqat Kardiologiya İnstitutu gənc tədqiqatçıları elmə dəvət edir və onlara yüksək səviyyəli elmi mühitdə bilik və bacarıqlarını inkişaf etdirmək üçün imkan yaradır.