Səhiyyə Nazirliyinin Respublika QİÇS-lə Mübarizə Mərkəzi (RQMM) Ədliyyə Nazirliyinin Tibb Baş İdarəsi ilə birgə Penitensiar Xidmətin cəzaçəkmə müəssisəsində İnsanın İmmunçatışmazlığı Virusu (İİV) ilə bağlı maarifləndirici tədbir və müayinələr təşkil edib.

Azmedinfo.az xəbər verir ki, tədbir çərçivəsində RQMM-in mütəxəssisləri məhkumlara İİV və Qazanılmış İmmun Çatışmazlığı Sindromu (QİÇS) barədə geniş məlumat veriblər. Onlar bu virusa yoluxan şəxslərin immun sisteminin zəiflədiyini, nəticədə müxtəlif yoluxucu və qeyri-yoluxucu xəstəliklərə qarşı daha həssas olduqlarını vurğulayıblar.

Məhkumlara İİV infeksiyasına qarşı profilaktik tədbirlər, fərdi qorunma yolları və erkən aşkarlamanın əhəmiyyəti izah olunub. Eyni zamanda İİV-ə yoluxmuş şəxslərin müalicəsinin düzgün təşkili, müalicənin davamlılığının vacibliyi və anonim şəkildə tibbi dəstək alma imkanları barədə tövsiyələr verilib.

Tədbir zamanı məhbuslara İİV, Hepatit B və C, eləcə də sifilis infeksiyalarına qarşı ekspres-testlərdən keçmək imkanı yaradılıb. Onları maraqlandıran suallar cavablandırılıb və maarifləndirici broşur və bukletlər paylanıb.

Bu cür tədbirlər risk qruplarında İİV-in erkən aşkarlanması və ictimai sağlamlığın qorunması baxımından mühüm əhəmiyyət daşıyır.