Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunun həkim mütəxəssisləri 29–30 may 2025-ci il tarixlərində Naxçıvan Dövlət Universiteti Tibb Fakültəsinin yaradılmasının 25 illiyinə həsr olunmuş “Cərrahi və mama-ginekologiya problemlərinə multidissiplinar yanaşmalar” mövzusunda keçirilən beynəlxalq konfransda iştirak ediblər.

Azmedinfo.az İnstitutdan verilən məlumata istinadən yazır ki, konfransın neonatologiyanın aktual problemlərinə həsr olunmuş panel sessiyasında institutun Vaxtından Əvvəl Doğulmuşların Patologiyası şöbəsinin müdiri, tibb elmləri doktoru, dosent Adilə Hacıyeva moderator kimi çıxış edib. Neonatologiyanın aktual problemlərinin müzakirəsi və elmi əsaslandırılması məqsədilə Elmi-Tədqiqat Pediatriya İnstitutunun (ETPİ) həkim mütəxəssisləri – tibb üzrə fəlsəfə doktorları Sevinc Mehdiyeva, Aygün Məmmədova, Tükəz Məmmədova, həmçinin Nuranə Məmmədova, Nərmin Əzizova, Pəri Məmmədova, anestezioloq Afaq Salmanova və uşaq cərrahı Aysel Miriyeva müxtəlif mövzularda çıxışlar ediblər.

Uşaqların Beynəlxalq Müdafiəsi Günündə Tibbi Müayinə Aksiyası
Daha sonra, 1 iyun – Uşaqların Beynəlxalq Müdafiəsi Günü münasibətilə Naxçıvanda “Sağlam Uşaqlar, Sağlam Gələcək” adlı tibbi müayinə aksiyası keçirilib. Aksiya çərçivəsində Bakı şəhərindən dəvət olunmuş müxtəlif ixtisaslar üzrə həkim-mütəxəssislər, o cümlədən ETPİ-nin 3 həkim əməkdaşı tərəfindən uşaqların müayinəsi aparılıb.

Ümumilikdə 300-dən çox uşaq əhatəli tibbi müayinədən keçib. Aksiyada valideynlərlə maarifləndirici söhbətlər də aparılıb, onlara uşaqların sağlam inkişafı, düzgün qidalanma, fiziki aktivlik və profilaktik tədbirlərin əhəmiyyəti barədə geniş məlumat verilib.

Sonda uşaqların müayinəsində iştirak edən həkim mütəxəssislərə Təşəkkürnamə təqdim edilib.