Soydaşımız, onkohematologiya sahəsində görkəmli mütəxəssis Pərvin Zeynalova Rusiya Elmlər Akademiyasının müxbir üzvü seçilib. Hazırda 165 alim REA-nın müxbir üzvüdür və onların arasında P.Zeynalova da daxil olmaqla 27 qadın var.

Azmedinfo.az xəbər verir ki, Pərvin Zeynalova AZƏRTAC-ın müxbirinə müsahibəsində tibb sahəsində, elmdə və həyatda keçdiyi yoldan danışıb: “1974-cü ildə Bakıda anadan olmuşam. 1997-ci ildə N. Nərimanov adına Azərbaycan Tibb Universitetini bitirmişəm. Bundan sonra tale məni Moskva ilə bağladı. Elə həmin il Rusiya Elmlər Akademiyasının N.N.Bloxin adına Rusiya Xərçəng Elmi-Tədqiqat Mərkəzinin Hemoblastozların kimyaterapiyası şöbəsində aspiranturaya daxil oldum. Karyeramın təxminən iyirmi ilini burada keçirdim”.

Alim daha sonra vurğulayıb: “Bu müddət ərzində namizədlik və doktorluq dissertasiyalarımı müdafiə etdim. 2016-cı ildə Hematologiya və sümük iliyinin transplantasiyası kafedrasına rəhbərlik mənə həvalə olunub. Həmin vaxt bu kafedra iki əsas bölməni birləşdirirdi: hemoblastozların kimyaterapiyası və intensiv terapiya. Bu, mənim fəaliyyətimin çox mühüm və məsuliyyətli mərhələsi idi”.

Doktor Zeynalova 2020-ci ildən fəaliyyətini “Ana və uşaq” şirkətlər qrupunun “Lapino 2” Onkologiya Mərkəzində davam etdirir. O, burada Onkohematologiya kafedrasına rəhbərlik edir, eyni zamanda, İ.M.Seçenov adına Birinci Moskva Dövlət Tibb Universitetinin Onkologiya kafedrasının professoru və Moskva Dövlət Tibb Universitetinin “Onkohematologiya” praktiki jurnalının redaktorudur.

Həmyerlimiz əlavə edib: “Göstərilən etimada görə Rusiya Elmlər Akademiyasına ürəkdən minnətdaram. Bu, təkcə mənim şəxsi işimə deyil, həm də bütün komandamızın fərdiləşdirilmiş onkohematologiyanın inkişafına ümumi töhfəsinə verilən yüksək qiymətdir. Eyni zamanda, bu, mənim üçün təkcə yüksək şərəf deyil, həm də elm, xəstələr və gələcək həkim nəsilləri qarşısında böyük məsuliyyətdir”.

Fəridə Abdullayeva