İcbari tibbi sığortanın tətbiq edildiyi dövlət tibb müəssisələrinin rəhbər heyəti üçün Ankara Universitetində “Xəstəxanaların idarə edilməsi” mövzusunda keçirilən 11 günlük təlim kursu başa çatıb.

Azmedinfo.az xəbər verir ki, təlim İcbari Tibbi Sığorta üzrə Dövlət Agentliyi (Agentlik) ilə Ankara Universiteti arasında imzalanmış “Təhsil xidmətlərinin göstərilməsi və elmi əməkdaşlığa dair Protokol” çərçivəsində Ankara Universiteti və Türk Əməkdaşlıq və Koordinasiya Agentliyinin (TİKA) dəstəyi ilə təşkil olunub. Təlim xəstəxanaların inzibati heyətinin bilik və bacarıqlarını inkişaf etdirmək məqsədilə keçirilib.

Təlim proqramında Agentliyin və Tibbi Ərazi Bölmələrini İdarəetmə Birliyinin (TƏBİB) əməkdaşları ilə yanaşı, 13 dövlət tibb müəssisəsinin direktor və müavinləri də iştirak ediblər.
Təlim proqramının bağlanış mərasimində Ankara Universitetinin rektoru Prof. Dr. Necdet Ünüvar, Sağlamlıq Elmləri İnstitutunun direktoru Prof. Dr. Emine Özmete, TİKA-nın vitse-prezidenti Prof. Dr. Rəhman Nurdun və Azərbaycan Respublikasının Türkiyə Respublikasında fövqəladə və səlahiyyətli səfiri Rəşad Məmmədov iştirak ediblər. Agentliyin İdarə Heyətinin sədri Zaur Əliyev və TƏBİB-in İcraçı direktoru Vüqar Qurbanov isə tədbirə onlayn qaydada qoşulublar.

Tədbirin açılışında çıxış edən Prof. Dr. Emine Özmete qeyd edib ki, bu proqramlar davamlı şəkildə həyata keçirilməlidir: “Sağlamlıq idarəçiliyi sahəsində qazandığımız təcrübənin qardaş Azərbaycana ötürülməsi iki ölkə arasındakı strateji əməkdaşlığa da töhfə verir”.

TİKA-nın vitse-prezidenti Prof. Dr. Rəhman Nurdun bildirib ki, 1992-ci ildən bu günə qədər Azərbaycanda 1500-dən çox layihə həyata keçiriblər: “Onlardan 160-ı məhz səhiyyə sahəsinə aiddir. TİKA olaraq Azərbaycanın səhiyyə sahəsindəki inkişaf təşəbbüslərinə daim dəstək verməyə və birgə yeni layihələr həyata keçirməyə hazırıq”.

Zaur Əliyev təlim proqramının keçirilməsində Agentliyə dəstək olan TİKA-ya və Ankara Universitetinə dərin təşəkkürünü bildirib: “2022-ci ildən etibarən artıq 5-ci dəfədir ki, bu təlimlər keçirilir və bu müddət ərzində iştirakçılar tibb müəssisələrinin effektiv idarə olunmasına dair yeni bilik və yanaşmalara yiyələniblər. İcbari tibbi sığortanın uğurlu tətbiqində tibb müəssisələrində idarəetmənin gücləndirilməsi xüsusi əhəmiyyət daşıyır və bu kimi beynəlxalq təcrübə mübadiləsi prosesə mühüm töhfə verir”.

Vüqar Qurbanov çıxışında qeyd edib ki, keçirilən təlimlər fəaliyyətimizin məqsədinə doğru atılan mühüm addımlardandır: “Dövlət səhiyyə siyasətinin mütərəqqi idarəçilik yolu ilə həyata keçirilməsi və tibb müəssisələrinin beynəlxalq standartlara uyğun təşkili əsas vəzifələrimizdəndir”.

Prof. Dr. Necdet Ünüvar isə çıxışında bu təlimlərin həm peşəkar, həm də mənəvi baxımdan önəmini vurğulayıb: “Bu təlimlərlə sadəcə məlumat paylaşmırıq, həm də qardaş ölkə ilə təcrübəmizi bölüşürük. 70 saatdan çoxunu əhatə edən bu proqramın faydalı olacağına ürəkdən inanıram. Eyni niyyətlə bu işi gələcəkdə də davam etdirəcəyik”.

Rəşad Məmmədov qeyd edib ki, bu təşəbbüsün uzun müddət davam etməsi təşkilatçılar və iştirakçıların işə olan ciddi və məsuliyyətli münasibətindən xəbər verir: “Bu proqramlar həm Azərbaycan, həm də Türkiyə səhiyyəsinin inkişafına böyük töhfə verir. İki qardaş ölkə arasında səhiyyə sahəsində davamlı əməkdaşlığın möhkəmlənməsi hər iki tərəf üçün qiymətli təcrübə və bilik mübadiləsi imkanı yaradır”.

Təlim müddətində iştirakçılar xəstəxanalarda insan resurslarının idarəedilməsi, keyfiyyətin idarəedilməsi və akkreditasiya, səhiyyə xidmətlərinin maliyyələşdirilməsi və iqtisadi qiymətləndirmə, eləcə də xəstəxanalarda korporativ fəaliyyətin qiymətləndirilməsi kimi mövzularda müzakirələr aparıblar.

Proqram çərçivəsində nümayəndə heyəti Türkiyənin bir sıra tibb müəssisələrində və idarəetmə strukturlarında olub, səhiyyə idarəçiliyi sahəsində informasiya texnologiyalarının tətbiqi imkanlarını yerindəcə araşdırıblar.

Qeyd edək ki, təlim proqramı Ankara Universitetinin Səhiyyənin idarə edilməsi bölməsinin professor-müəllim heyəti, müvafiq xəstəxanaların rəhbər və işçiləri və Türkiyə Səhiyyə Xidmətlərində Keyfiyyət və Akkreditasiya İnstitutu tərəfindən tədris edilib.

Sonda iştirakçılara sertifikatlar təqdim edilib və xatirə şəkli çəkilib.