Küveyt Dövlətinin Azərbaycandakı səfiri Məhəmməd Feysəl Əlmuteyri “Respublika Qan Bankı” publik hüquqi şəxsin icraçı direktoru Elxan Nağıyev ilə görüşüb.

Azmedinfo.az xəbər verir ki, səfir xeyriyyəçilik və səhiyyə sahəsinə diqqət və qayğının nümunəsi olaraq donor kimi qan verib.

Diplomat Respublika Qan Bankında səmərəliliyin və təşkilatçılığın səviyyəsini yüksək qiymətləndirib, Azərbaycanın tibb sahəsinin, xüsusilə səhiyyə sisteminin dəstəklənməsinin əsas sütunu olan qan donorluğu mərkəzlərində müşahidə olunan tərəqqiyə heyran olduğunu bildirib.

Tərəflər, həmçinin Küveyt Dövlətinin səhiyyə orqanları ilə Azərbaycandakı müəssisələr arasında, xüsusilə könüllü donorluq kampaniyalarının təşkili, təlim və tibbi reabilitasiya sahələrində əməkdaşlığın və təcrübə mübadiləsinin genişləndirilməsi yollarını müzakirə ediblər.