“Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”na uyğun olaraq, səhiyyə sistemində bilik və bacarıqların artırılması, eyni zamanda yerli təlimçi heyətinin formalaşdırılması istiqamətində mühüm addımlar atılır.

Azmedinfo.az xəbər everir ki, Naxçıvan Muxtar Respublikası Səhiyyə Nazirliyinin mətbuat xidmətinin məlumatına görə, bu məqsədlə nazirliyin təşəbbüsü ilə yaradılan Seminar, Treninqlər və Simulyasiya Mərkəzinin fəaliyyətinin təşkili üçün ilkin mərhələdə seçilmiş həkim-təlimçilər Bakı şəhərində ixtisasartırma təlimlərində iştirak edirlər.

Hazırda 12 nəfər həkim heyəti Ə.Əliyev adına Azərbaycan Dövlət Həkimləri Təkmilləşdirmə İnstitutunda “Tibb elmlərinin tədrisi” mövzusunda təlimçilər üçün təşkil olunan təlim kursuna qatılıb.

Təlim proqramı çərçivəsində həkimlər simulyasiya əsaslı yanaşmalar, tədris metodikaları və praktik bacarıqlar üzrə biliklərini artıracaq, gələcəkdə bölgədə sertifikasiya proseslərinin təşkili və peşəkar hazırlıq sisteminin qurulmasına töhfə verəcəklər.