Tarif (qiymət) Şurasının 2025-ci il 30 iyun tarixində keçirilmiş növbəti iclasında dərman vasitələrinin qiymətləri ilə bağlı mühüm qərar qəbul edilib.

Azmedinfo.az xəbər verir ki, iclas zamanı dövlət qeydiyyatına yeni alınan 207 dərman vasitəsinin qiymətinin yuxarı həddi təsdiqlənib. Eyni zamanda, 3 dərman vasitəsinin qiymətinin yuxarı həddi azaldılıb. Etibarlı təchizatın təmin edilməsi məqsədilə isə 79 dərman vasitəsinin qiymətində dəyişiklik aparılıb.

Qərarlar Nazirlər Kabinetinin 3 iyun 2015-ci il tarixli 209 nömrəli Qərarı ilə təsdiqlənmiş Qaydalara və Tarif (qiymət) Şurasının 21 iyul 2015-ci il tarixli Qərarı ilə qəbul olunmuş Təlimata uyğun şəkildə həyata keçirilib.

Ticarət adı, farmasevtik forması, təsiredici maddəsi, dozası, ticarət qablaşdırması, miqdarı və istehsal ölkəsi nəzərə alınmaqla qiymətləri müəyyən edilmiş dərman vasitələrinin tam siyahısı Tarif (qiymət) Şurasının rəsmi internet saytının "Dərman vasitələri" bölməsində yerləşdirilib.