Vaxtından əvvəl doğulmuş körpələrin sağlam inkişafına dəstək tədbiri

10 İyul 2025

434

Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunda (ETPİ) analar üçün ana südünün təbliği adlı növbəti maarifləndirici tədbir keçirilib.

Azmedinfo.az xəbər verir ki, tədbirin əsas mövzusu vaxtından əvvəl doğulmuş körpələrin qidalanması və onlara göstərilən düzgün qulluq prinsipləri olub.

Tədbirdə institutun Vaxtından əvvəl doğulmuşların patologiyası şöbəsinin həkim-pediatrı t.e.d.,Nüşabə Pənahova çıxış edərək, erkən doğulmuş körpələrin xüsusi qidalanma ehtiyacları, onların həssas immun sisteminin qorunması və inkişaf prosesinin dəstəklənməsi ilə bağlı ətraflı məlumat verib.

Nüşabə xanım qeyd edib ki, belə körpələrin inkişafı mərhələli və nəzarətli şəkildə izlənməlidir. Onların əsas qida mənbəyi kimi ana südünün rolu burada da önə çıxır. Ana südü, vaxtından əvvəl doğulan körpələr üçün daha uyğun tərkibə malik olmaqla, onların bağırsaq sistemi və immunitetinin gücləndirilməsində mühüm rol oynayır.

Tədbirdə iştirakçılara körpələrin ev şəraitində izlənməsi, çəkilərinin nəzarətdə saxlanılması, vaxtlı-vaxtında tibbi müayinələrdən keçirilməsi və qidalanmanın düzgün aparılması haqqında da izahlı məlumat verilib. Maarifləndirici videoçarx nümayiş olunub, analar öz suallarını verərək həkimdən praktiki tövsiyələr alıblar.

Bu tip görüşlər ETPİ-də mütəmadi şəkildə təşkil olunur və vaxtından əvvəl doğulmuş körpələrin sağlam inkişafına dəstək göstərmək, analarda düzgün yanaşma vərdişləri formalaşdırmaq məqsədi daşıyır.