Azərbaycan Respublikası Səhiyyə Nazirliyinin Elmi-Tədqiqat Ağciyər Xəstəlikləri İnstitutunun təşkilatçılığı ilə Qusar Rayon Mərkəzi Xəstəxanasında “Vərəmin aşkarlanması, diaqnostikası, müalicəsi və profilaktikasına müasir yanaşmalar” mövzusunda regional praktik təlim keçirilib.

Azmedinfo.az xəbər verir ki, tədbirdə Elmi-Tədqiqat Ağciyər Xəstəlikləri İnstitutunun direktoru, tibb üzrə fəlsəfə doktoru İradə Axundova, Qusar Rayon Mərkəzi Xəstəxanasının direktoru Kamil Hacıyev, baş həkim Əjdər Ağacanov, eləcə də Qusar və Xaçmaz rayonlarının ilkin səhiyyə xidməti həkimləri iştirak ediblər.

İnstitut direktoru İradə Axundova Ümumdünya Səhiyyə Təşkilatı tərəfindən hazırlanmış və vərəmin aşkarlanmasında mühüm əhəmiyyət daşıyan PAL (Practical Approach to Lung Health) strategiyası barədə ətraflı təqdimatla çıxış edib.

Tədbirin əsas məqsədi ilkin səhiyyə xidmətinin vərəmin erkən aşkarlanması, nəzarətli müalicə və profilaktikasında rolunun təkmilləşdirilməsi olub.

Elmi-Tədqiqat Ağciyər Xəstəlikləri İnstitutunun Poliklinika şöbəsinin həkim-ftiziatrı Aysel Aslanova isə vərəmin müalicəsi və diaqnostikasına dair müasir klinik protokollar barədə geniş təqdimatla çıxış edib, habelə ilkin səhiyyə həkimlərinin bu prosesdə rolu ilə bağlı ətraflı məlumat verib.

Təlim interaktiv formatda davam etdirilib, mövzu ətrafında müzakirələr aparılıb və iştirakçıların sualları cavablandırılıb.