Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda Elmi Şuranın iyul ayı üzrə 6 saylı iclası keçirilib. İclası institutun direktoru, Elmi Şuranın sədri t.ü.f.d., dos. Aynur Poluxova açaraq gündəlikdə aşağıdakı məsələlərin yer aldığını bildirib: elmi şöbələrin 2025-ci ilin ilk yarım ili üzrə hesabatları, vakant yerlərlə bağlı məsələlər və digər cari mövzular.

Azmedinfo.az xəbər verir ki, Yenidoğulmuşların patologiyası, pediatriya, tibbi-sosial araşdırmalar və diaqnostik laboratoriyalar üzrə şöbə rəhbərlərinin hesabatları dinlənilib, geniş müzakirələr aparılıb və fəaliyyətin təkmilləşdirilməsi istiqamətində tövsiyələr verilib. Hesabatlar açıq səsvermə ilə qənaətbəxş hesab edilib.

Elmi katib t.ü.f.d., dos. Sevinc Nəsirova “Tibb” qəzetində dərc olunmuş vakant yerlər barədə məlumat verib. Uşaq xəstəlikləri üzrə elmi şöbəyə kiçik elmi işçi vəzifəsinə namizəd İsgəndərli Qəmər Niyazi qızının namizədliyi gizli səsverməyə çıxarılıb. 15 iştirakçıdan 10-u lehinə, 5-i əleyhinə səs verib və namizəd vəzifəyə uyğun bilinib.

Bundan əlavə, “Tibb” qəzetinin 30 iyun 2025-ci il tarixli buraxılışında Elmi-Tədqiqat Pediatriya İnstitutunda vakant olan müxtəlif elmi vəzifələr barədə məlumat təqdim olunub. İclasda avqust ayında Qazaxıstanda, sentyabrda isə Səmərqənddə keçiriləcək beynəlxalq tədbirlər haqqında məlumat verilib və əməkdaşların iştirakı nəzərdə tutulub.

Sonda direktor qarşıdakı vəzifələrin yerinə yetirilməsi ilə bağlı tövsiyələrini səsləndirib.