Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda kollektivin iştirakı ilə növbəti işçi toplantısı keçirilib.

Azmedinfo.az xəbər verir ki, institutun direktoru, dosent Aynur Poluxova müxtəlif struktur bölmələrdə çalışan əməkdaşlarla – həkimlər, şöbə müdirləri, tibb bacıları və kiçik tibb personalı ilə görüşüb. Toplantı zamanı müəssisənin gündəmdə olan prioritet məsələləri barədə hesabat təqdim olunub, mövcud problemlərin həlli istiqamətində nəzərdə tutulan tədbirlərin planı açıqlanıb.

Görüşdə direktor keyfiyyətli tibbi xidmətin təşkili ilə bağlı əməkdaşların üzərinə düşən məsuliyyəti xüsusi vurğulayıb. Pasiyentlərin hərtərəfli müayinəsi və müalicəsi, valideynlərlə maarifləndirmə işlərinin aparılması, onların məmnunluğunun təmin olunması məsələlərində kollektivin rolunun vacibliyi qeyd olunub.

Tədbir çərçivəsində bir qrup əməkdaş təşəkkürnamə ilə təltif edilib. Həmçinin Xəstə Xidmətləri və Tibbi Sığorta Şöbəsinin əməkdaşlarının yüksək səyi nəticəsində əldə olunan nailiyyətlər kollektivə təqdim olunub.

Toplantı institut daxilində peşəkar fəaliyyətin möhkəmləndirilməsi və işgüzar mühitin inkişaf etdirilməsi baxımından mühüm əhəmiyyət daşıyıb.