Hər il iyulun 28-i Ümumdünya Hepatitlə Mübarizə Günü kimi qeyd olunur. Bu əlamətdar tarixin əsas məqsədi ağır qaraciyər xəstəliyinə gətirib çıxaran və hepatoselüler karsinomaya səbəb olan iltihablı qaraciyər xəstəliyi - virus hepatitləri haqqında məlumatlılığın artırılmasıdır.

Azmedinfo.az Ümumdünya Səhiyyə Təşkilatına (ÜST) istinadla xəbər verir ki, bu il Ümumdünya Hepatitlə Mübarizə Gününün devizi "Hepatitlə mübarizə: maneələri məhv etmək"dir. O, hepatitlərin aradan qaldırılmasına və qaraciyər xərçənginin qarşısının effektiv alınmasına mane olan maliyyə, sosial və sistemli amillərin aradan qaldırılması üçün təxirəsalınmaz tədbirlərə çağırışa xidmət edir.

ÜST-nin təqdim etdiyi statistik məlumatlara görə, 2022-ci ildə 304 milyon insan xroniki B və C hepatitindən əziyyət çəkib. Həmin il ərzində anadan olan körpələrin yalnız 45%-i doğuşdan sonrakı ilk sutka ərzində hepatit B-yə qarşı peyvənd olunub. Həmçinin xroniki hepatit B və C 1,3 milyon insanın həyatına son qoyub.

Qeyd edək ki, xroniki hepatit B və C xərçəng də daxil olmaqla, ağır qaraciyər zədələnmələrinə səbəb olur, lakin onların qarşısını almaq və nəzarət etmək, hepatit C olduqda, isə tamamilə müalicə etmək mümkündür.

Hepatitlə mübarizə kampaniyasının seçilmiş mövzusu milli səhiyyə sistemləri daxilində hepatitlə mübarizə üzrə kompleks tədbirlərin, o cümlədən peyvənd, təhlükəsiz inyeksiya təcrübələri, qaraciyərə mənfi təsirlərin minimuma endirilməsi və ilk növbədə hepatitin diaqnostikası və müalicəsinin təkmilləşdirilməsi və geniş şəkildə həyata keçirilməsi zərurətini xatırladır. Həmçinin kompleks şəkildə hepatoloji köməyə əlçatanlığı yaxşılaşdırmaq və 2030-cu ilə qədər hepatitin artıq ictimai sağlamlıq təhlükəsi olmaması üçün təcili tədbirlər görməyə çağırır.