Azmedinfo.az kollektivi olaraq 20 sentyabr - Dövlət Suverenliyi Günü münasibətilə xalqımızı təbrik edir, müstəqil və suveren Azərbaycanımızın daha da çiçəklənməsini arzulayırıq!

20 Sentyabr – Dövlət Suverenliyi Günü Azərbaycan dövlətçilik tarixində yeni bir səhifə açaraq, xalqımızın milli iradəsinin və mübarizə əzminin təntənəsini əks etdirir.

1991-ci ilin 20 sentyabrında Azərbaycan Ali Soveti "Dövlət Suverenliyi haqqında" Konstitusiya Aktını qəbul etdi. Bu sənəd Azərbaycanın müstəqil, azad və suveren dövlət olmaq yolunda atdığı ilk mühüm addım idi. Lakin ərazi bütövlüyünün pozulması tam suverenliyə mane olurdu.

2020-ci ilin İkinci Qarabağ müharibəsi və 2023-cü ilin sentyabrındakı lokal xarakterli antiterror tədbirləri nəticəsində Azərbaycan öz suverenliyini bütün ərazilərində tam bərpa etdi. Qondarma rejim fəaliyyətini dayandırdı və Azərbaycanın Konstitusiya quruluşu tam şəkildə bərpa olundu.

2024-cü ildə Prezident İlham Əliyevin Sərəncamı ilə 20 Sentyabr rəsmi olaraq Dövlət Suverenliyi Günü elan edildi. Bu gün, xalqımızın azadlıq və müstəqillik uğrunda apardığı mübarizənin zirvəsini təcəssüm etdirir. Prezidentin 2025-ci ili “Konstitusiya və Suverenlik İli” elan etməsi də bu dəyərlərə verilən önəmin bariz nümunəsidir.

Bu suverenlik səhiyyə sahəsində də özünü göstərir. Ölkəmiz artıq xarici donorlardan asılı olmadan, öz milli maraqlarına uyğun sağlam səhiyyə siyasəti həyata keçirir. Son illər ərzində yeni tibb müəssisələri tikilib, mövcud xəstəxanalar müasir avadanlıqlarla təchiz edilib. Məcburi Tibbi Sığortanın tətbiqi ilə hər bir vətəndaşın keyfiyyətli tibbi xidmətlərə əlçatanlığı təmin olunub. Azərbaycanlı tibb mütəxəssisləri beynəlxalq tədbirlərdə fəal iştirak edərək ölkəmizin adını yüksəldirlər.

Dövlət Suverenliyi Günü hər bir azərbaycanlı üçün fəxr və qürur mənbəyidir. Bu, xalqın birlik və iradəsini göstərən tarixi bir gündür.