Özəl tibb müəssisəsində tibbi xidmətin icbari tibbi sığorta hesabına qarşılanması vətəndaşların ən çox maraqlandığı məsələlərdəndir.

Azmedinfo.az xəbər verir ki, İcbari Tibbi Sığorta üzrə Dövlət Agentliyinin Göndərişlər şöbəsinin müdiri Arif Əkbərov müsahibəsində, bu xidmətlərin yalnız müəyyən hallarda və konkret qaydalar çərçivəsində ödənişsiz göstərildiyini deyib. Ekspert bildirir ki, hazırda Xidmətlər Zərfi çərçivəsində 3315 adda tibbi xidmət icbari tibbi sığorta hesabına həyata keçirilir. Vətəndaş ilk olaraq TƏBİB-in tabeliyindəki dövlət tibb müəssisəsinə və ya Səhiyyə Nazirliyinə məxsus elmi-tədqiqat mərkəzlərindən birinə müraciət etməlidir. Əgər tələb olunan tibbi xidmət həmin müəssisədə göstərilmirsə, bu zaman vətəndaş göndəriş əsasında digər dövlət və ya müqaviləli özəl tibb müəssisəsinə yönləndirilir.

Arif Əkbərovun sözlərinə görə, vətəndaş göndərişlə Agentliyin müqavilə bağladığı özəl klinikaya müraciət etdikdə, Xidmətlər Zərfi çərçivəsində göstərilən xidmətlər tamamilə ödənişsiz olur. Hazırda Agentlik 190-dan çox özəl tibb müəssisəsi ilə əməkdaşlıq edir və həmin müəssisələrin siyahısı agentliyin rəsmi saytındakı “Tibb müəssisələrinin axtarış sistemi” bölməsində ictimaiyyət üçün açıqdır.

Ekspert əlavə edib ki, təcili və təxirəsalınmaz vəziyyətlərdə vətəndaş özəl tibb müəssisəsinə göndərişsiz müraciət edə bilər. Əgər şəxs qəfil halın pisləşməsi ilə xəstəxanaya yerləşdirilirsə, bu zaman 24 saat ərzində xəstəxana agentliyə elektron bildiriş göndərməlidir. Xidmət təcili hal sayılırsa və Xidmətlər Zərfinə daxildirsə, bütün xərclər sığorta hesabına ödənilir.

Əkbərov bildirib ki, göndəriş təsdiqləndikdən sonra vətəndaş SMS vasitəsilə birdəfəlik kod alır və “e-Tabib” mobil tətbiqi üzərindən xidmət alacağı özəl tibb müəssisəsini şəxsi seçimi əsasında müəyyənləşdirə bilir. Bu sistem şəffaflıq təmin edir və vətəndaşın seçim hüququnu qoruyur. Eyni zamanda, seçim QR kod və ya agentliyin rəsmi internet saytı vasitəsilə də edilə bilər. Əgər göndəriş təsdiqlənməzsə, vətəndaşa bu barədə SMS vasitəsilə məlumat verilir.

Cari ildən etibarən vətəndaşlar göndəriş təqdim etmədən icbari tibbi sığorta hesabına stasionar tibbi xidmətlərdən istifadə etmək üçün Azərbaycan Tibb Universitetinin Tədris Terapevtik Klinikası, ATU-nun Tədris Cərrahiyyə Klinikası və Bakı Sağlamlıq Mərkəzinə birbaşa müraciət edə bilirlər. Bu müəssisələrdə terapevtik və cərrahi xidmətlər sığorta hesabına göstərilir.

2025-ci ilin ilk yarısında 154987 göndəriş verilib və nəticədə vətəndaşlara 89560 tibbi xidmət göstərilib. Bu xidmətlərdən 1738-i uşaqlara, 87822-si böyüklərə aid olub. Ən çox xidmət invaziv radiologiya, oftalmologiya və ürək-damar cərrahiyyəsi üzrə həyata keçirilib.

Sonda ekspertin qeyd edib ki, göndərişlə özəl klinikaya müraciət edən vətəndaşlardan əlavə ödəniş tələb edilməsi qanunsuzdur. Xidmətin dəyəri tam şəkildə Agentlik tərəfindən tibb müəssisəsinə ödənilir. Əgər vətəndaş belə hallarla üzləşərsə, dərhal “1542” Çağrı Mərkəzi ilə əlaqə saxlamalıdır.